30.07.2010. Lidhur më Kosovën,OKB koordinohet me BE-në Kombet e Bashkuara do të koordinojnë veprimet me Bashkimin Evropian rreth dialogut mes Kosovës dhe Serbisë, pas mendimit të GJND-së.Sekretari i përgjithshëm i Kombeve të Bashkuara, Ban Ki Mun, ka thënë se do të ndihmojnë dialogun në mes palëve. Vreeswijk: Nën hetime çdokush që ka bërë krim Dy ditë pasi ka marrë konfirmimin se është emëruar kryeprokuror i EULEX-it, Johannes Van Vreeswijk, ka thënë se EULEX-i, nuk e ka ndërmend të ndalet në hetimet rreth korrupsionit dhe krimit të organizuar në Kosovë. Në një intervistë për të përditshmen Koha Ditore, holandezi që e ka ushtruar detyrën e kryeprokurorit prej kur EULEX-i ka filluar hetimet kundër korrupsionit dhe krimit të organizuar, ka prezantuar detaje të hetimeve të EULEX-it në rastin Limaj, guvernatorit Rexhepi, rastin e PTK-së, atë të Ilir Tolaj dhe për rastin Bllaca.Vreeswijk ka ripërsëritur se ka prova të mira në rastin Limaj dhe se ministri i dyshuar do të merret në pyetje. Ai nuk ka dashur të flas për ministrat tjerë që mund të jenë duke u hetuar nga EULEX-i, por ka thënë se ka edhe raste tjera të ngjashme me atë të Limajt.Ky prokuror holandez ka paralajmëruar se misioni po i heton 25 raste të ndryshme në veri, gjashtë prej të cilave i ka futur në listën e ngushtë dhe do t’i shqyrtojë këtë të martë.Ai po ashtu, duke folur për raste tha se ndonëse SHIK-u mund të jetë shuar zyrtarisht, ende ka shumë arsye që dëshmitë e Bllacës të merren seriozisht.  Londra kundër rezolutës serbe për Kosovën Ministria britanike e Punëve të Jashtme ka kritikuar paraqitjen e projektrezolutës së re serbe në Asamblenë e Përgjithshme të Kombeve të Bashkuara për Kosovën, duke shprehur dëshpërimin për këtë hap për të cilin nuk u konsultua paraprakisht me Bashkimin Evropian, edhepse ishte zotuar se do ta bëjë këtë. Në një njoftim të Ministrisë Britanike të Punëve të Jashtme thuhet se Asambleja e Përgjithshme duhet të miratojë një rezolutë e cila do të ishte neutrale, me qëllim që Serbia e Kosova të inkurajohen të nisin bashkëpunimin, ndërsa projektrezoluta serbe nuk shpie drejt realizimit të këtij qëllimit, prandaj Britania e Madhe edhe nuk mund ta mbështesë.Këto qëndrime i ka përsëritur për BBC-në edhe ambasadori i Mbretërisë së Bashkuar në Beograd, Stephen Wordsworth."Është e qartë se shtetet që kanë njohur Kosovën, sikurse Britania, nuk mund të pajtohen me diçka që para Kombeve të Bashkuara, Këshilli i Sigurimit praktikisht të anulojë deklaratën e pavarësisë. Mirëpo, ekziston mënyrë për harmonizimin e tekstit që do të kënaqte interesat e të dyja palëve, kurse gjuha që shfrytëzohet në këtë rezolutë konkrete, për ne është e papranueshme", tha ambasadori britanik. 29.07.2010. Thaçi: Kurrfarë dialogu me Serbinë për çështje të brendshme Në intervistën për “Botën sot”, kryeministri Thaçi në mënyrë kategorike mohon se është ofruar ndonjë model për Veriun, madje ai thotë se nuk do të ketë as dialog për këtë çështje.Pas vizitës në SHBA dhe vendimit të rëndësishëm për Kosovën në GJND, kryeministri i vendit duket më i relaksuar. Megjithatë pranon se vendin e presin angazhime të tjera si në procesin e lobimit për njohje të reja, ashtu edhe në procesin për t’u integruar në strukturat euroatlantike. Qeveria e tij nuk mjaftohet me kaq, si duket pas këtij vendimi, ndër më të rëndësishmit pas Pavarësisë së Kosovës, do të fillojë betejat si në arenën ndërkombëtare ashtu edhe në atë vendore. Bota sot: Z. Kryeministër Kosova triumfoi ndaj Serbisë në GJND me rezultat 10 me 4. Ju keni bërë të ditur disa herë të mirat e kësaj. Çfarë po e zbeh vendimin e GJND-së apo pse po flitet për aq shumë pengesa, që nga vetë BE-ja e tutje? Thaçi: Fitoren historike të diplomacisë së Kosovës në opinionin pozitiv të Gjykatës Ndërkombëtare të Drejtësisë për statusin politik të Kosovës, për shtetin e pavarur dhe sovran nuk mund ta zbeh askush në asnjë rrethanë. Përkundrazi, kjo fitore vetëm sa do të afirmohet. Kjo fitore e qeverisë së Kosovës, e institucioneve dhe e popullit të Kosovës do të vlerësohet jashtëzakonisht shumë, do të ketë të mirat e veta në kuptimin e gjithanshëm të progresit të zhvillimit, të konsolidimit dhe forcimit të shtetit tonë, të njohjeve të reja, të përshpejtimit të procesit për tu integruar në NATO, BE dhe në OKB. Opinioni i Gjykatës Ndërkombëtare është një njohje e gjerë ndërkombëtare për shtetin tonë të pavarur dhe sovran. Është një hapje e kapitullit të ri për të ardhmen më të mirë të Kosovës, por edhe gjithë rajonit. Kjo është një fitore më tepër se vetëm e Kosovës, është fitore e gjithë rajonit, andaj dua të besoj fuqishëm se këtë sukses do ta prezantojmë, do ta afirmojmë dhe do ta jetësojë edhe në praktikë për të mirën e shtetit dhe qytetarëve të vendit. Hyseni takoi ambasadoren amerikane Ministri i Punëve të Jashtme i Republikës së Kosovës, Skender Hyseni, ka vazhduar serinë e takimeve me përfaqësues të përhershëm të akredituar pranë Organizatës së Kombeve të Bashkuara nga shtete që ende nuk e kanë njohur Republikën e Kosovës. Vetëm gjatë ditës së sotme, Ministri ka zhvilluar mbi dhjetë takime të ndryshme, me qëllimin themelor për të shpjeguar kuptimin dhe përmbajtjen e mendimit këshillëdhënës të Gjykatës Ndërkombëtare të Drejtësisë, dhe në vijim të kësaj, për të ripërsëritur thirrjen për njohjen e shtetit të Kosovës. Gjatë qëndrimit në Nju Jork, Ministri Hyseni ka zhvilluar edhe një takim të veçantë me Ambasadoren Amerikane Rosemary DiCarlo. Në këtë takim të gjatë dhe miqësor, Ministri Hyseni dhe Ambasadorja DiCarlo kanë biseduar në detaje rreth hapave dhe veprimeve të ardhshme që do të ndërmerren pas dhënies së Mendimit të Gjykatës Ndërkombëtare të Drejtësisë. Në këtë takim, Ministri Hyseni ka falënderuar Shtetet e Bashkuara të Amerikës për mbështetjen e tyre të vazhdueshme për Kosovën, si dhe ka theksuar nevojën e bashkërendimit të ngushtë të aktiviteteve dhe veprimeve të të dyja vendeve. Deçan, protestë- kërkohet lirimi i Haradinajt Me nismë të kryetarit të Komunës së Deçanit, Rasim Selmanaj, të premten (më 30 korrik) organizohet një marshim protestues i të gjithë nëpunësve dhe zyrtarëve të tjerë të Komunës së Deçanit, për të shprehur pakënaqësinë dhe indinjatën me vendimin e Dhomës së Apelit të TPI-së, për rigjykimin e ish-kryeministrit të Kosovës dhe kryetarit të AAK-së, Ramush Haradinaj, dhe njëherit do të kërkohet lirimi sa më i shpejtë i tij. Manifestimi do të jetë i karakterit të një shëtitjeje të qetë, duke nderuar sakrificën e njerëzve të Ushtrisë Çlirimtare të Kosovës, me vënie lulesh te bustet dhe përmendoret e të rënëve të UÇK-së në sheshet e Deçanit.Njoftohet se manifestimi nis në orën 12:00, kur kryetari i Komunës së Deçanit dhe të gjithë nëpunësit tjerë, të veshur me bluza me simbolin e kampanjës në mbështetje të Haradinajt, do të nderojnë te shtatorja e Heroit të Kombit, Luan Haradinaj, në sheshin qendror të qytetit, për të vazhduar më pas te shtatoret e të rënëve të tjerë në këtë qytet.Bëhet e ditur se manifestime të tilla me kërkesë për lirimin sa më të shpejtë të ish-kryeministrit të Kosovës dhe kryetarit të AAK-së, z. Ramush Haradinaj, do të mbahen edhe në ditët në vijim, në Deçan dhe anembanë Kosovës. 28.07.2010. Sejdiu optimist për njohje Presidenti Fatmir Sejdiu pret që Kosova të njihet së paku nga 30 vende pas shpalljes së opinionit të Gjykatës Ndërkombëtare të Drejtësisë. Ai thotë se vendi planifikon të aplikojë për anëtarësim në OKB, por nuk ka saktësuar se kur do të ndodhë një gjë e tillë. Në një intervistë për të përditshmen japoneze, “Yomiuri”, e cila aktualisht është gazeta me tirazhin më të madh në botë, me 14 milionë kopje që shiten çdo ditë, Sejdiu ka përqeshur përpjekjet e Beogradit për të hapur çështjen e statusit.“Opinioni ishte një moment historik për Kosovën dhe një ditë e bekuar po ashtu”, ka thënë Sejdiu, duke i bërë thirrje shteteve të botës që ta njohin pavarësinë e Kosovës.Presidenti i Kosovës ka thënë se “shumë shtete kanë thënë se janë duke pritur shpalljen e këtij opinioni para se ta njohin pavarësinë”.Sejdiu ka shpalosur planet e Kosovës për të aplikuar për anëtarësim në OKB, por ka thënë se nuk mund të thotë në mënyrë precize se kur mund të ndodhë një gjë e tillë dhe se për këtë duhet paraprakisht edhe një numër i caktuar i njohjeve.“Do të ishte mrekulli nëse aplikacionin tonë do ta prezantonim në shtator”Përpjekjet e Serbisë, e cila synon miratimin e një rezolute në Asamblenë e Përgjithshme të OKB-së në shtator për t’u hapur rrugë bisedimeve për statusin i ka vlerësuar irracionale, derisa ka thënë se Kosova do të kërkojë ndihmën e shteteve që e kanë njohur pavarësinë për t’i bllokuar këto përpjekje që i ka vlerësuar qesharake. Tash Beogradi kërkon rezolutë me BE-në Opinioni i Gjykatës Ndërkombëtare të Drejtësisë “zbut” fjalorin e rezolutës serbe. Beogradi i ka ofruar Brukselit që të zbusë rezolutën e vet dhe ajo që ajo t’i paraqitet Asamblesë së Përgjithshme të OKB-së si propozim BE-Serbi, por Brukseli thuhet të ketë refuzuar propozimin serb, duke insistuar në variantin e vet që e ka dhënë para dhjetë ditësh. Duke u thirrur në burime qeveritare serbe, gazeta Blic shkruan se Beogradi i ka ofruar Brukselit një variant më të “butë” të rezolutës, ku nuk përmenden “negociatat për status”, por edhe kjo është refuzuar nga shefja për Politikë të Jashtme e BE-së, Catherine Ashton.Megjithatë, kontaktet Bruksel-Beograd rreth çështjes vazhdojnë. Beogradi shkruan gazeta “Blic” vazhdon të përpiqet të gjejë gjuhë të përbashkët me BE-në dhe oferta e re e qeverisë serbe, sipas zyrtarëve të saj është që në rezolutë të mos definohet paraprakisht karakteri i bisedimeve mes Prishtinës dhe Beogradit.Një gjë e tillë, deri tani është refuzuar kategorikisht nga zyrtarët në Bruksel, shkruan gazeta. 27.07.2010. Thaçi çmon kontributin e lobit shqiptaro-amerikan Kryeministri i Republikës së Kosovës, Hashim Thaçi tha se e çmon lart kontributin për njohjen e Kosovës, që ka dhënë dhe po jep lobi amerikan. Kreu i ekzekutivit të Kosovës këto komente i bëri në takimin me udhëheqësin e Këshillit Kombëtar Shqiptaro-Amerikan, Avni Mustafaj.“Fitorja në GJND, është edhe fitore e lobit amerikan”, tha Thaçi pas takimit me Mustafën.Ky i fundit, premtoi se angazhimi i Këshillit Kombëtar Shqiptaro-Amerikan, do të vazhdojë edhe më tutje që të lobojë për njohjen e Kosovës. Mendimi i GJND-së, siç tha Mustafa, vërtetoi edhe një herë se shpallja e pavarësisë së Kosovës, nuk ka qenë në kundërshtim me të drejtën ndërkombëtare. Ambasadori austriak në pushim të “detyrueshëm” Walter Maria Stojan, ambasador austriak në Kosovë është dërguar në pushim të detyrueshëm, ngase ditë më parë në Prishtinë ka rrahur bashkëshorten e tij. Suspendimi i tij, sipas burimeve diplomatike të gazetës Zëri vjen pasi në Prishtinë, ai ka rrahur bashkëshorten e tij. Sipas të njëjtit burim, largimi i tij nga Kosova është bërë pasi që rasti i rrahjes ka bërë “bujë” të madhe në vendin nga vjen ambasadori.Ndërkohë, zyrtarë nga Ambasada e Austrisë në Prishtinë nuk pohojnë nëse shefi i tyre është suspenduar “shefi” i tyre, por kanë bërë me dije se ambasadori Walter Maria Stojan aktualisht është duke shfrytëzuar pushimin e rregullt vjetor.Burimet ndërkombëtare në Kosovë i kanw sqaruar gazetës se bashkëshortja e tij ka vendosur që rrahjen ta lërë me kaq, ngase rastin nuk parapëlqen ta procedojë në gjykatë.  26.07.2010. Thaçi: Opinioni i GJND-së legjitimoi pavarësinë Kryeministri i Kosovës, Hashim Thaçi një ditë pas kthimit nga SHBA-të në fjalimin para deputetëve të Kuvendit të Kosovës, vlerësoi lartë mendimin pozitiv të GJND-së për pavarësinë e Kosovës, duke shprehur qëndrimin se opinioni është i drejtë dhe shprehu vullnetin e popullit për liri. Ky mendim, siç tha Thaçi, legjitimoi pavarësinë e Kosovës, në tërë botën duke treguar se shpallja e pavarësisë nuk ishte në kundërshtim me të drejtën ndërkombëtare.Ajo çka konkludoi drejtësia ndërkombëtare, siç tha Thaçi, i dha të drejtë edhe përpjekjes dhe luftës së popullit të Kosovës për liri.Gjatë adresimit të tij para deputetëve, Thaçi kërkoi nga vendet që kanë qenë në proces të njohjes së Kosovës ta bëjnë një gjë të tillë, pasi GJND-ja ka dhënë një motiv shtesë që të njihet pavarësia e Kosovës.Ky mendim sipas kryeministrit të Kosovës, do të jetë edhe një obligim për institucionet e Kosovës që të punojnë më shumë për zhvillimin e vendit.Si rezultat i zhvillimeve të fundit, kryeministri Thaçi, mendon se pavarësisë së mbikëqyrur suksesshëm i ka ardhur fundi.Thaçi këto komente i bëri një ditë pas vizitës së tij në SHBA. Atje, siç tha kryeministri ka marrë mbështetjen e qeverisë amerikane për shtetin e Kosovës dhe bashkëpunimi ndërmjet dy shteteve, sipas tij vetëm sa do të thellohet. Ministrat e jashtëm të BE-së diskutojnë për Kosovën Ministrat e jashtëm të Bashkimit Evropian (BE) do të diskutojnë sot për Kosovën, pas dhënies së mendimit këshillëdhënës të Gjykatës Ndërkombëtare të Drejtësisë.Në takimin e sotëm pritet që Brukseli t’i ofrojë Prishtinës dhe Beogradit mbështetje të plotë politike për dialog që synon ndërtimin e raporteve të mira fqinjësore për një të ardhme më të mirë. Belgjika, e cila është kryesuese e radhës e Bashkimit Evropian, ia ka bërë të ditur Beogradit se ajo që i intereson tani është sjellja e Serbisë pas vendimit të gjykatës. Ndërkohë sipas burimeve të gazetës sllovene Delo, sot në Bruksel nuk pritet të nxirret ndonjë konkluzion i ri. Mirëpo, sipas kësaj gazete, shefat e diplomacive do të diskutojnë si të veprohet më tutje. Kosova është i vetmi shtet i Ballkanit Perëndimor, i cili për shkak të mosunitetit brenda vendeve anëtare, mosnjohjes nga pesë sosh ende nuk e ka nisur procesin e liberalizimit të vizave. Ambasadorët kundër emisarëve Derisa, Republika e Serbisë ka aktivizuar qindra emisarë për të lobuar kundër njohjeve të reja të Kosovës, zëvendësministrja e Punëve të Jashtme e Republikës së Kosovës, Vlora Çitaku thotë se Prishtina zyrtare kësaj lufte do t’i përgjigjet me ambasadorët dhe rrjetin diplomatik. Qeveria e Kosovës nuk e ka ndërmend që të hartojë strategji gjithëpërfshirëse vepruese për lobim, ndërsa parashikon që ofensivës diplomatike serbe, t’i kundërvihet me logjistikën që ka në dispozicion.Me këtë rast, ekzekutivi i vendit, veçanërisht diplomacia kosovare, “eliminon institucionalisht” figura të ndryshme të shoqërisë kosovare që të merren me fushën e lobimit, duke ua lënë atyre lobimin, vetëm si angazhim spontan individual.Çitaku thotë se lobimi nuk është e drejtë ekskluzive e MPJ-së, por sipas saj nuk ka nevojë për mekanizma paralelë, siç e quan ajo, krijimin e grupit punues për lobim, që do të koordinohej nga ministri i jashtëm Skender Hyseni.Ajo thekson se MPJ-ja e ka një koordinim të mirë me partnerët ndërkombëtarë, ndërsa sipas saj, kushdo që shprehë interesim për të dhënë kontribut në këtë drejtim “do t’i ketë dyert e hapura”. 24.07.2010. Qëllimi i SHBA-ve: Kosova të jetë tërësisht e pavarur Ideale do të ishte që Kosova të ishte një vend ku nuk do të ishte e nevojshme, as prania ushtarake, as ajo civile- ka thënë në një intervistë për Radion Evropa e Lirë, Philip Gordon, ndihmëssekretar i Shtetit për çështjet evropiane dhe të Euro-Azisë. Duke folur për ndihmën që administrata amerikane jep për të sjellë njohje të reja, Gordon ka thënë se SHBA-të kanë biseduar me miqtë e tyre që nuk e kanë pranuar ende Kosovën dhe kanë pritur opinionin e GJND-së, ashtu që shpresojnë që ata do ta marrin hapin e duhur për ta bërë këtë.“Deri tani 69 vende e kanë marrë këtë hap, përfshi shumicën e vendeve fqinje të Kosovës dhe shumicën dërrmuese të vendeve anëtare të BE-së. Një numër i konsiderueshëm shtetesh ishin në pritje të opinionit të Gjykatës, një pjesë e të cilave e kanë pritur me kërkesën e vetë Serbisë”, ka thënë Gordon.Ai ka shfaqur shpresën që vendimi i GJND-së do çojë në përmirësimin e gjendjes së sigurisë në mënyrë që KFOR-i të zvogëlohet deri në largimin e plotë, dhe po ashtu, sipas tij, SHBA-të do të vazhdojnë ta mbështesin Kosovën në vendosjen e shtetit ligjor në të gjithë territorin, në mënyrë që EULEX-i të mos jetë më i nevojshëm.“Qëllimi ynë është ta shohim Kosovën tërësisht të pavarur, që funksionon pa nevojën e pranisë ndërkombëtare. Opinioni i Gjykatës na ndihmon në përmbushjen e synimit”, ka thënë Gordon. Serbia ta pranojë vendimin e GJND-së Presidenti Fatmir Sejdiu ndodhet në Tiranë ku ka zhvilluar një takim me homologun shqiptar, Bamir Topi. Gjatë konferencës për shtyp, dy presidentët e kanë vënë theksin te vendimi i fundit i Gjykatës Ndërkombëtare të Drejtësisë. “Vendimi i GJND-së shton në mënyrë të ndjeshme kredibilitetin e shtetit të ri të Kosovës, duke e ftuar atë drejt një ecje të re, njohjeve të reja dhe drejt një bashkëpunimi më institucional në rajonin e Ballkanit”, tha presidenti i Shqipërisë, Bamir Topi.Ai e përgëzoi Sejdiun për rolin e tij, së bashku me lidershipin e politikës në Kosovë, “për ndryshimin e imazhit të këtij vendi, në këtë periudhë e cila ka qenë vendimtare për zhvillimin e tij”.Më tej, Topi është shprehur se Serbia duhet ta pranojë vendimin e Gjykatës Ndërkombëtare të Drejtësisë, duke qenë se ishte vetë Beogradi që kërkoi një opinion për shpalljen e pavarësisë së Kosovës.Gjatë qëndrimit në Tiranë, Sejdiu do të zhvillojë një takim edhe me kryeministrin Sali Berisha. Hashim Rexhepi paraqitet në gjykatë Guvernatori i Bankës Qendrore, Hashim Rexhepi, është paraqitur në Gjykatën e Qarkut rreth orës 9:00. I përcjellë nga Policia e Kosovës, Rexhepi ka hyrë në Gjykatë për të pritur fillimin e seancës e cila do të nisë rreth mesditës. Aty do të vendoset për caktimin e masës së sigurisë. Për dallim prej një dite më parë, ku Rexhepi nën pranga është parë duke qeshur, sot është dukur më serioz.Hashim Rexhepi u arrestua me dyshimin për korrupsion, shpërdorim të detyrës zyrtare, marrje të ryshfetit, shmange të tatimit, ushtrim të ndikimit dhe shpëlarje të parave. Së bashku me të janë arrestuar edhe tre persona të tjerë.Policia e EULEX-it ka bastisur zyrën dhe shtëpinë e Rexhepit si edhe tre vende të tjera. 23.07.2010. Arrestohet guvernatori i BQK-së, Hashim Rexhepi Që nga ora 06:00 e mëngjesit oficerët e Policisë së Kosovës që janë pjesë e “Task Force” Kundër Korrupsionit, kanë bastisur shtatë lokacione, përfshirë banesat private të katër të dyshuarve, zyrat e Bankës Qendrore të Kosovës si dhe një kompani private, ndërsa është arrestuar Guvernatori i BQK-së, Hashim Rexhepi. Në njoftimin e EULEX-it, thuhet se këto bastisje janë të ndërlidhura me një hetim financiar dhe për korrupsion ku dyshohet për keqpërdorim të detyrës apo pozitës zyrtare, marrje të ryshfetit, shmangie të tatimit, ushtrim të ndikimit dhe larje të parave.Këto hetime i konfirmuan edhe zyrtarë të Bankës Qendrore të Kosovës, ndërsa bënë të ditur se hetimet po zhvillohen edhe në lokacionin e zyrtares për mbikëqyrje financiare Shkëndije Hima.Bastisjet janë autorizuar nga gjykatësi i procedurës paraprake i EULEX-it nga Gjykata e Qarkut në Prishtinë.Një prokuror kosovar nga Prokuroria Speciale e Kosovës (SPRK), Nazmi Mustafa si dhe monitoruesit policor to EULEX-it dhe një oficer ndërlidhës, ndodhen në Bankën Qendrore për mbikëqyrje dhe për të siguruar mbledhjen efektive të provave materiale si dhe për t’u dhënë shpjegimet e plota dhe të duhura personave që janë aty. GJND-ja ka vendosur shtetin e Kosovës As njohësit më të mirë ndërkombëtarë të rrethanave të Kosovës nuk kanë pritur që opinioni i Gjykatës Ndërkombëtare të Drejtësisë të jetë kaq i prerë në favor të Kosovës. Në interpretimet e tyre për të përditshmen Koha Ditore profesori i së drejtës ndërkombëtare Mark Weller, eksperti i Këshillit Evropian për Politikë të Jashtme Richard Gowan, eksperti për Ballkanin, Tim Judah dhe ish shefi i Zyrës ligjore për Kosovën Alexader Borg Olivier kanë thënë se, me gjithë argumentet pro pavarësisë së Kosovës “janë befasuar nga mënyra e drejtpërdrejtë me të cilën GJND-ja i kanë legjitimitet aktit të shpalljes së pavarësisë".Sipas tyre, opinioni do të mundësojë njohje të reja, ndërsa Serbisë i mundëson që të pajtohet me realitetin e ri dhe të angazhohet në bisedimet praktike me Kosovën.Sipas tyre, është e mundur që Serbia “edhe pas këtij shoku të vazhdojë përpjekjet destruktive siç është ajo e ndarjes së veriut”. Serbia të mos pengojë më bashkëpunimin rajonal Organizata për Bashkëpunim Rajonal dhe Integrime Evropiane (OBRIE) e përshëndeti vendimin e Gjykatës Ndërkombëtare të Drejtësisë lidhur me pavarësisë e shtetit të Kosovës, si dhe ftoi Serbinë që tash e tutje, të mos pengojë iniciativat për bashkëpunim rajonal dhe projektet e përbashkëta të vendeve të rajonit që mund të përshpejtojnë rrugën drejt integrimeve euroatlantike. “Gjykata botërore e OKB-së me seli në Hagë, duke u bazuar në normat së drejtës ndërkombëtare e shpalli legale (de jure) pavarësisë e Kosovës. Ky verdikt i drejtësisë ndërkombëtare, do t'i heqë dilemat e shumë shteteve që se kanë njohur ende Kosovën, por edhe do të ndikojë që Serbia në të ardhmen të ketë një qasje më ndryshe, më racionale ndaj shtetit të ri”, thuhet në komunikatën e OBRIE. 22.07.2010. Sejdiu: GJND-ja bekoi pavarësinë e Kosovës Presidenti i Republikës së Kosovës, Fatmir Sejdiu, e ka vlerësuar si të bekuar ditën e enjte, pak çaste pasi Gjykata Ndërkombëtare e Drejtësisë dha opinion pozitiv lidhur me ligjshmërinë e shpalljes së pavarësisë së Kosovës. Ai ftoi vendet që deri sot kanë hezituar ta njohin Kosovën, ta marrin këtë vendim, i cili sipas tij vetëm sa do t’i kontribuojë paqes dhe stabilitetit në rajon. Presidenti Sejdiu tha se GJND-ja dha opinion pozitiv për ligjshmërinë e pavarësisë së Kosovës dhe bekoi institucionet e Kosovës.“Ky mendim rikonfirmoi fuqishëm se shpallja e pavarësisë së Kosovës ka qënë në pajtim të plotë me të drejtën ndërkombëtare dhe lirinë e popullit për vetëvendosje”.Sejdiu tha se mendimi këshillëdhënës i GJND-së i hoqi dilemat edhe të vendeve që nuk e kanë njohur deri më sot pavarësinë e Kosovën dhe u bëri thirrje që tash e tutje të mos hezitojnë.Gjykata Ndërkombëtare e Drejtësisë vërtetoi sot se Kosova nuk paraqet precedent, por njeh të drejtën e popullit të Kosovës për vetëvendosje, për të jetuar i lirë dhe i pavarur”Sejdiu tha se Republika e Kosovës është e përkushtuar të jetë partner paqeje, e përkushtuar për zbatuar planin gjithëpërfshirës të Martti Ahtisaarit dhe Kushtetutën e saj.Presidenti i Kosovës e ka ftuar Serbinë që të ndryshoj politikën fqinjësore dhe t’i bashkëngjitet vizionit të vendeve të rajonit për integrim në strukturat euroatlantike.Ai tha se vizioni i vetëm Republikës së Kosovës është integrimi në Bashkimin Evropian dhe NATO.Sejdiu tha se Republika e Kosovës shpreh falënderim për vendet që e kanë mbështetur në rrugën e saj drejtë lirisë dhe pavarësisë, në radhë të parë Shtetet e Bashkuara të Amerikës, shtetet anëtare të Bashkimit evropian dhe të gjitha vendet demokratike të botës. Berisha: GJND-ja iu dha fund pazareve me tokat shqiptare Kryeministri i Shqipërisë, Sali Berisha, në një konferencë të drejtpërdrejtë për media, menjëherë pas shpalljes së opinionit rreth ligjshmërisë së shpalljes së pavarësisë së Kosovës, vlerësoi se vendimi i sotëm i Gjykatës Ndërkombëtare të Drejtësisë është historik për të ardhmen e shtetit të Kosovës. Ai tha se pavarësia ishe e njohur nga bota e lirë në tërësinë e saj, por ky vendim i GJND-së sipas tij mbetet vendim hyjnor për Kosovën dhe për të gjithë shqiptarët.“Analiza ishte e kristaltë, fitorja ishte bindëse. Ishte e tillë sepse e drejta ishte në anën e shqiptareve. Madje ky vendim pritej edhe nga ato vende qe nuk e njohur Kosovën, sepse shumica e tyre kishte respekt te madh për vuajtjet dhe sakrificat që përjetuan shqiptarët e Kosovës për një shekull”.Kryeministri Berisha falënderoi Shtetet e Bashkuara të Amerikës dhe aleatët evropian për kontributin që kanë dhënë që populli i Kosovës të jetojë i lirë dhe i pavarur.Berisha tha se Shqipëria deri tani ka bërë çdo përpjekje të mundshme për të ndikuar në njohjen e pavarësisë së Kosovës dhe do të vazhdojë lotimin, i cili sipas tij tani do të jetë më i lehtë, “sepse vendimi GJND-së i ka dhënë mbështetjen më të fuqishme këtij procesi”.Kryeministri Berisha tha se GJND-ja me vendimin që mori të enjten i dha fund edhe kapitullit të pazareve territoriale të tokave shqiptarëve, e në radhë të parë të Kosovës. GJND: Pavarësia nuk shkel të drejtën ndërkombëtare Presidenti i GJND-së nga Japonia, Hisashi Owada, ka goditur rëndë Serbinë, duke i kumtuar opinionin se shpallja e pavarësisë së Kosovës nuk e ka shkelur të drejtën ndërkombëtare. Ai ka deklaruar se nuk ekziston asnjë nen në ligjet ndërkombëtare që ndal shpalljen e një anshme të pavarësisë, prandaj shpallja e një anshme nuk ka shkelur të drejtën ndërkombëtare.Më tej Owada ka përmendur ecurinë e tërësishme të zhvillimeve politike në Kosovë, që kanë të bëjnë me vendosjen e misionit të OKB-së në Kosovë, vendosjen e KFOR-it e të tjera.Në Gjykatën Ndërkombëtare të Drejtësisë (GJND) në Hagë, pikërisht në orën 15.00, ka nisur seanca ku do të shpallet opinioni këshillëdhënës rreth pavarësisë së Kosovës.Presidenti i GJND-së nga Japonia, Hisashi Owada, ka nisur leximin e deklaratës, e cila është miratuar paraprakisht nga 15 gjyqtarë. U caktua Kolegji gjyqësor për rastin Haradinaj Kryetari i Tribunalit të Hagës, Patrick Robinson, ka caktuar Kolegjin gjyqësor tre anëtarësh, i cili do të udhëheqë procesin e përsëritur pjesërisht kundër ish komandantit të UÇK-së, Ramush Haradinaj, dhe dy të tjerëve. Në kolegjin gjyqësor janë Bakone Justice Moloto, kryetar dhe Barton Hall Aguedelo.Pas formimit të kolegjit duhet të caktohet shqyrtimi kryesor. Sipas statutit të Tribunalit nuk ka afat brenda të cilit duhet të caktohet shqyrtimi i ri kryesor.Zëdhënësja e Tribunalit të Hagës, Nerma Jelacic, ka thënë të enjten se “duke pasur parasysh rrethanat e rastit, kjo do të jetë ndodhë shumë shpejt”, njoftojnë mediet.Pushimi veror i punës së gjykatës fillon më 26 korrik dhe zgjat deri më 13 gusht.Kolegji ankimues i Tribunalit të Hagës ka anuluar të mërkurën vendimin për lirimin e Haradinajt me arsyetimin se procesin fillestar e ka karakterizuar frikësimi i dëshmitarëve. Thaçi: Besoj në pafajësinë e Haradinajt Kryeministri i Kosovës, Hashim Thaçi, ka thënë se është i bindur se Ramush Haradinaj do të dalë i pafajshëm. “Besoj në pafajësinë e Haradinajt”, ka thënë Thaçi në një intervistë dhënë për Klan Kosova, nga SHBA-të.Ai tha se lufta e UÇK-së ka qenë e drejtë dhe e pastër, prandaj, sipas tij, nuk ka dyshim se pastërtinë e luftës do ta dëshmojë edhe Haradinaj në Hagë.“Unë dua të besoj se sikur herën e parë, siç ka ndodhur me Haradinajn, ashtu do të ndodhë edhe tash dhe Haradinaj do të dalë i pafajshëm”, ka thënë Thaci. Sot pritet të shpallet opinioni i GJND-së Gjykata Ndërkombëtare e Drejtësisë pritet që pasditen e së enjtes ta bëjë të ditur opinionin këshillëdhënës lidhur me ligjshmërinë e shpalljes së pavarësisë së Kosovës. Në seancë do të jenë të pranishëm ministri i Jashtëm i Republikës së Kosovës, Skënder Hyseni dhe ai i Serbisë Vuk Jeremic.Ndryshe, Asambleja e Përgjithshme e Kombeve të Bashkuara, pati mbështetur me shumicë votash kërkesën e Serbisë për dërgimin e rastit në Gjykatë dhe shqyrtimin e ligjshmërisë së shpalljes së pavarësisë.Një numër i shtetesh të BE-së, pastaj disa shtete të ish-Jugosllavisë si Kroacia, Sllovenia kanë mbështetur Kosovën në GJND, ndërsa vendet si Kina, Spanja, Rusia etj ishin në anën e Serbisë.Liderët e vendit kanë pohuar se pavarësia është e pakthyeshme, pavarësisht vendimit të GJND-së dhe një vlerësim i tillë është dhënë edhe nga vendet, përkrahëse të Kosovës.Ndërkaq, zyrtarë serbë janë shprehur se pavarësisht opinionit të GJND-së, Serbia nuk do ta njoh Kosovën dhe Beogradi do ta çojë çështjen në vjeshtën e ardhshme në Asamblenë e Përgjithshme të OKB-së.Ndërkaq, katër ditë pas shpalljes së vendimit të GJND-së për Kosovën, Bashkimi Evropian pritet të deklarohet për këtë çështje. 21.07.2010. SHBA-ja po përgatit 40 njohje të reja për Kosovën Vetëm një ditë para verdiktit të Gjykatës Ndërkombëtare të Drejtësisë për pavarësinë e Kosovës, Serbia është në panik. Shtetet e Bashkuara të Amerikës po përgatiten që pas fjalës së Hagës, të bindin së paku 40 shtete që ta njohin pavarësinë e Kosovës, raporton Press e transmeton KTV.Me këtë, SHBA-ja dëshiron t’i prishë planet e Serbisë për Rezolutën që do të kërkonte negociata të reja në OKB.Në këtë mënyrë, plani është që deri më 15 shtator, kur nis punimet Asambleja e Përgjithshme, shteti i Kosovës të jetë njohur nga 110 shtete, në mënyrë që të arrihet shumica aty.Madje, edhe mund të kërkohej një vend për Kosovën në OKB. Ballafaqimi i parë i madh i Serbisë me Amerikën do të jetë në fund të këtij muaji në Ugandë, në Samitin e Afrikës. Përndryshe, në ditën e vendimit, në kishat serbe do të ketë lutje masive dhe do të dëgjohen kambanat. Qeveria e brengosur për rigjykimin e Haradinajt Kryeministri i Republikës së Kosovës, Hashim Thaçi dhe Qeveria e Republikës së Kosovës e ka përcjellë me vëmendje procesin gjyqësor të shkallës së dytë dhe shpreh brengosje për procesin e rigjykimit ndaj Ramush Haradinajt dhe luftëtarëve tjerë të Ushtrisë Çlirimtare të Kosovës .Qeveria e Kosovës nëpërmjet një komunikatë për media ka kërkuar nga qytetarët që ta ruajnë qetësinë dhe të kenë besim në drejtësinë ndërkombëtare.“Qeveria e Republikës së Kosovës shpreh keqardhje për këtë vendim të gjykatës, mirëpo është e bindur se Haradinaj do të dëshmojë pafajësinë e tij në rigjykimin e pjesshëm, ashtu si në rastin e gjykimit të tij në këtë gjykatë, e cila e kishte shpallur i pafajshëm”, thuhet në komunikatë.Më tej thuhet se Qeveria e Republikës së Kosovës rithekson se Ushtria Çlirimtare e Kosovës ka zhvilluar luftë të drejtë për liri dhe demokraci, për mbrojtjen e vlerave të qytetërimit, dhe ka respektuar të gjitha konventat ndërkombëtare të luftës.“Institucionet, qytetarët e Republikës së Kosovës dhe vete z. Haradinaj kanë dhënë provat e bashkëpunimit dhe të besimit në drejtësinë ndërkombëtare, një gjë e cila po rikonfirmohet edhe në rastin aktual”, thuhet në njoftim. Paraburgoset Ramush Haradinaj Gjykata e Hagës ka vendosur që të rigjykoj procesin “Haradinaj”. Vendimi u mor të mërkurën pas ankesës së Prokurorisë lidhur me vendimin e 3 prillit të vitit 2008 për lirimin e Ramush Haradinajt. Në fakt, Dhoma e Apelit vendosi paraburgimin e Haradinajt, Brahimajt e Balajt pasi kishin munguar dëshmitë e disa dëshmitarëve bazë dhe ka anuluar pjesërisht vendimin e Gjykatës për pafajësi ndaj Ramush Haradinajt, Idriz Balajt dhe Lahi Brahimajt.Apeli pranoi ankesën e prokurorisë se nuk i ishte dhënë kohë e mjaftueshme për të shfrytëzuar të gjitha rrugët në mënyrë që të paraqiteshin dy dëshmitarë kyçë të rastit. Apeli po ashtu ka arritur në përfundimin se Gjykata ka dështuar në marrjen e masave të nevojshme për të siguruar dëshmitë e disa prej dëshmitarëve.Dhoma e Apelit ka hedhur poshtë apelin e prokurorisë lidhur me akuzat e tjera.Gjykata ka vendosur paraburgimin e Ramush Haradinajt, Lah Brahimajt dhe Idriz Balajt deri në një vendim të ardhshëm.Ndërkohë, koordinatori i Ekipit të Mbrojtjes në Procesin e Ramush Haradinaj, Michael O'Reilly, përmes një komunikate për media, ka thënë se ekipi është i befasuar me vendimin e Dhomës së Apelit.Ekipi Mbrojtës i z. Haradinaj është jashtëzakonisht i befasuar me vendimin e sotëm, kjo është diçka që ne s’kemi mundur ta parashohim, posaçërisht duke pasur parasysh lirimin e tij të pamëdyshje dhe unanim të para dy viteve”, është shprehur O’Reilly. Mbi 8 mijë veta do të riatdhesohen brenda vitit Qeveria e Kosovës thotë se vetëm gjatë vitit 2010 do të kthehen 8 mijë e 200 shtetas kosovarë që nuk kanë leje qëndrimi në vendet e ndryshme evropiane. Procesi i riatdhesimit, sipas autoriteteve të Prishtinës paraqet një sfidë për institucionet shtetërore, andaj sipas tyre kthimi do të bëhet në grupe të vogla, pasi Kosova ka kapacitete të vogla absorbuese për pranimin e të gjithë atyre shtetasve, të cilët qëndrojnë ilegalisht në shtetet e ndryshme evropiane.Hajzer Salihu, ushtrues detyre i sekretarit permanent në Ministrinë e Punëve të Brendshme ka deklaruar se vetëm në gjashtë muajt e parë të këtij viti në mënyrë vullnetare janë kthyer rreth 1 mijë persona, ndërsa janë depërtuar 1 mijë e 500 të tjerë.Ndryshe, Kuvendi i Kosovës ka miratuar Ligjin për ripranim, kurse ekzekutivi deri më tani ka nënshkruar marrëveshje për riatdhesim me Shqipërinë, Francën, Zvicrën, Gjermaninë dhe Belgjikën.Marrëveshje të tilla pritet të nënshkruhen edhe me shtete tjera. AAK: Haradinaj do të shpallet sërish i pafajshëm Aleanca për Ardhmërinë e Kosovës lidhur me vendimin e Gjykatës së Hagës për rigjykimin e pjesshëm të Ramush Haradinajt u shpreh tej mase e befasuar, veçmas sipas tyre kur dihet që me një vendim unanim të Shkallës së Parë të këtij Tribunali, më 3 prill 2008, Haradinaj është shpallur i pafajshëm prej të gjitha akuzave. Zyrtarë të partisë Aleanca për Ardhmërinë e Kosovës theksuan se lajmi për rihapjen e pjesshme të gjykimit të Ramush Haradinajt, kryetarit të AAK-së, është një lajm shumë i keq për AAK, për qytetarët dhe shtetin e Kosovës.Ashtu si në marsin e vitit 2005, kur u shpall Aktakuza e Prokurorisë së Tribunalit të Hagës, ashtu edhe tani, në korrikun e vitit 2010, kur u mor vendimi për rihapjen e pjesshme të Gjykimit të Haradinajt, Kosova përballet me sprova të mëdha politike dhe të sigurisë”, thuhet në deklaratën e AAK-së.“Si AAK, jemi të bindur që proceset politike në Kosovë, veçmas ato që do të pasojnë në vijim të shpalljes që qëndrimit këshillëdhënës të Gjykatës Ndërkombëtare të Drejtësisë në Hagë, këtë të enjte, me 22 korrik, do të dëmtohen thellësisht. Si AAK, jemi të sigurt që si herën e parë, ashtu edhe tani, në Rigjykimin e pjesshëm që do të pasojë, shpresojmë, sa më parë që është e mundur, se Ramush Haradinaj, Kryetari i AAK-së, do të shpallet plotësisht i pafajshëm”, thuhet në njoftim.AAK fton qytetarët e Kosovës që të tregohen të matur dhe të pjekur si edhe herëve të tjera, ndërsa shprehen bindjen se AAK do t’i fitojë zgjedhjet e ardhshme parlamentare, dhe që Ramush Haradinaj do t’i prijë, si kryeministër, Qeverisë së Republikës së Kosovës. Kryeministri Thaçi takohet me zv.Presidentin amerikan Bajden Sot në Uashington, kryeministri Hashim Thaçi do të takohet me zvendëspresidentin amerikan Xhozef Bajden. Në kuadër të vizitës në SHBA, Hashim Thaçi dje mbajti një ligjëratë në Institutin e Paqes me temë: “Ndërtimi i së Ardhmes Evro-Atlantike të Kosovës”.    20.07.2010. Njësitë Speciale, gati Ministri i Punëve të Brendshme, Bajram Rexhepi thekson se vendimi i Gjykatës Ndërkombëtare të Drejtësisë nuk do të prodhojë tensione në veri të Mitrovicës. Megjithatë, Njësitë Speciale të Policisë së Kosovës janë të gatshme për të intervenuar në çdo moment kur kërkohet ndihma e saj për përfaqësuesit e EULEX-it.Ministri i Punëve të Brendshme, Bajram Rexhepi i ka deklaruar të përditshmes Zëri se vendimi pozitiv i GJND-së për Kosovën nuk do të reflektojë në tensionimin e situatës në veri të vendit.Megjithatë, sipas tij, autoritetet ndërkombëtare të rendit, por edhe ato të Kosovës janë në gjendje që t’i përgjigjen çdo rrethane që mund të çojë deri te rebelimi i serbëve në pjesën veriore të Mitrovicës.Ngjashëm është shprehur edhe shefi i Policisë, Behar Selimi, i cili ka theksuar se institucioni që ai drejton në bashkëpunim me EULEX-in i kanë planet e tyre të zakonshme operative, të cilat nënkuptojnë gatishmërinë për të ruajtur rendin dhe qetësinë me forca të shtuara nëse ka nevojë. Shpërthim në shtëpinë e gazetarit Milisavlevic Një mjet shpërthyes është hedhur në oborrin e shtëpisë së kryeredaktorit të Radio Mitrovicës, Çasllav Milisavlevic, me seli në Zveçan, kanë njoftuar zyrtarë të policisë në Mitrovicë. Sipas tyre shpërthimi ka ndodhur 35 minuta pas mesnate, por për fat të mirë nuk ka pasuar të lënduar, ndërsa me këtë rast janë dëmtuar tri makina që ishin të parkuar aty afër.Milisavlevic ka deklaruar për media se nuk i dinë motivet e këtij sulmi, ndërsa rastin e ka paraqitur në Policinë e Kosovës.Milisavleviq konsiderohet gazetar me pikëpamje të moderuara. Zyrtarë të policisë në Mitrovicë kanë theksuar se policia ka dalë në vendin e ngjarjes dhe është duke i kryer hetimet rreth rastit. Ban Ki Moon pret opinion pozitiv për Kosovën Sekretari i Përgjithshëm i Organizatës së Kombeve të Bashkuara, Ban Ki Moon ka deklaruar se pret një opinion pozitiv nga Gjykata Ndërkombëtare e Drejtësisë për pavarësinë e Kosovës.Por ai ka theksuar se pavarësisht kësaj, Kombet e Bashkuara dhe shtetet e tjera duhet të shikojnë realitetin e shtetit të ri kosovar. Ban ndodhet në Gjenevë dhe u pyet për këtë çështje nga televizioni shqiptar - Top Channel. “Jam i informuar për kërkesën serbe mbi legalitetin e pavarësisë së Kosovës. Vendimi do të jepet më 22 korrik dhe kjo temë do të jetë në qendër të debatit në Këshillin e Sigurimit. Por cilido që të jetë vendimi, vendet anëtare janë të detyruara të pranojnë realitetin e ri 19.07.2010. Pavarësia e Kosovës nuk kontrollohet nga ligji ndërkombëtar Derisa pritet që kësaj të enjte të jepet mendimi këshillues rreth ligjshmërsë së pavarësisë së Kosovës i Gjykatës Ndërkombëtare të Drejtësisë në Hagë, qëndrimi amerikan ka qenë gjatë gjithë kësaj kohe se Gjykata duhet të vendosë ose në favor të Kosovës ose të përmbahet nga çfarëdo vendimi.Në argumentet që paraqitën Shtetet e Bashkuara të Amerikës në Hagë në mbrojtje të ligjshmërisë së pavarësisë ishte edhe vlerësimi se pavarësia ka avancuar lirinë dhe stabilitetin në Ballkan . Pavarësia e Kosovës nuk është një diçka që kontrollohet nga ligjindërkombëtar’ por është ‘rrënjësisht një veprim politik… të cilin shtetet veç e veç vendosin se a do ta njohin apo jo.’ Idetë që qakullojnë sidomos nga pala serbe për mundësinë e bisedimeve rreth statusit pas dhënies së mendimit këshillues, zyrtarët amerikanë i kanë quajtur të kota sepse një orientim i tillë do të ‘shthurte marrëveshjet e mundimshme politike të cilat kanë sjellë stabilitet në rajon.’“Pavarësia e Kosovës, thonë zyrtarët amerikanë, është një realitet dhe ajo arsyetohet përballë shtypjes historike nën okupimin serb.” Përvëç kësaj, Washingtoni zyrtar argumenton se asnjë nga mbi 100 deklarata të pavarësisë anekand botës nuk është gjykuar të ketë shkelur ligjin ndërkombëtar e këtë nuk e ka bërë as Kosova. Kryeministri Thaçi ngushëllon Berishën Kryeministri i Kosovës, Hashim Thaçi, i ka dërguar telegram ngushëllimi kryeministrit të Shqipërisë, Sali Berisha.Me pikëllim të thellë morëm lajmin për humbjen e jetës së bashkëqytetarëve Tuaj, me rastin e aksidentit tragjik që ndodhi në aksin rrugor Rrëshen-Fushë Arrëz”.“Në emër të Qeverisë së Republikës së Kosovës dhe në emrin tim, ju shpreh ngushëllimet më të sinqerta, Ju, Qeverisë tuaj, qytetarëve të Shqipërisë dhe familjeve të viktimave, ndërkaq, të lënduarve ju urojmë shërim sa më të shpejt”, thuhet në telegram . E enjtja finale e GJND-së Mijëra faqe të shkruara nga Kosova, Serbia dhe 27 vende tjera në formë deklarate që argumentojnë pavarësinë e Kosovës apo që e thonë të kundërtën, bashkë me 9 seanca dëgjimore përbëjnë betejën legale për pavarësinë e Kosovës para Gjykatës Ndërkombëtare të Drejtësisë në Hagë. 15 gjykatësit e GJND-së, prej të cilëve 8 nga vendet që e kanë njohur pavarësinë dhe 7 të tjera që vijnë nga vendet që nuk e kanë bërë një gjë të tillë, i kishin para vetes të gjitha këto deklarata me shkrim dhe ato gojore dhe kanë marrë një vendim që do të artikulohet në formën e mendimit se ishte apo nuk ishte shpallja e pavarësisë në harmoni me të drejtën ndërkombëtare.Ky mendim do të lexohet me të enjten me 22 korrik, në ora 15:00 nga presidenti i Gjykatës Hishavi Ovada.Beteja në Hagë filloi me Asamblenë e Përgjithshme të OKB-së në shtator të vitit 2008, kur Serbia kërkoi nga Asambleja miratimin që të iniciojë interpretimin legal të shpalljes së pavarësisë së Kosovës nga ana e Gjykatës Ndërkombëtare, si trup i OKB-së. Propozimi i Serbisë pati kaluar me shumicë votash.  17.07.2010. Thaçi zhvillon vizitë në SHBA Kryeministri i Republikës së Kosovës, Hashim Thaçi, të dielën do të udhëtojë për një vizitë zyrtare në Shtetet e Bashkuara të Amerikës, ku gjatë kësaj vizite ai në Shtëpinë e Bardhë, do të zhvillojë një takim me zëvendëspresidentin e Shteteve të Bashkuara të Amerikës, Joseph Biden. Sipas një njoftimi të zyrës së kryeministrit në kuadër të vizitës zyrtare në SHBA, kryeministri Thaçi do të ketë takime në Departamentin e Shtetit dhe në Kongresin e SHBA-ve, ndërsa do të pritet në takime të nivelit të lartë edhe nga udhëheqësit e Bankës Botërore dhe Fondit Monetar Ndërkombëtar. Thaçi gjithashtu në Institutin e Paqes të Shteteve të Bashkuara të Amerikës, do të mbajë ligjëratë me temën ”Ndërtimi i të ardhmes euro-atlantike të Kosovës: Sfidat dhe mundësitë para nesh”. Në përbërje të delegacionit kosovar thuhet se do të jetë edhe ministri i Ekonomisë dhe Financave, Ahmet Shala, i cili do të merr pjesë në mbledhjen e Bordit të Fondit Monetar Ndërkombëtar, që do të mbahet në Uashington, prej 18 deri më 24 korrik 2010. Fitou: Statusi, territori nuk negociohen Duke paralajmëruar një fazë të re për Kosovën, atë të dialogut me Serbinë, ambasadori francez në Kosovë, Jean Fraçois Fitou ka bërë të ditura se çështjet të cilat asesi nuk do të hapen në bisedime janë ndryshimi i kufijve, shkëmbimi i territoreve dhe statusi i Kosovës. Në një intervistë për të përditshmen Koha Ditore, ambasadori francez thekson se Prishtina e Beogradi kanë një listë të gjatë temash për të cilat do të mund të bisedonin si për ekonominë, doganat, ujin, rrymën etj.Fitou ka sqaruar se nuk ka kërkuar autonomi të veçantë për veriun e Mitrovicës, siç është përfolur ditë më parë deklarata e tij, por sipas tij ai ka përdorur një lloj shprehje që nuk është përkthyer mirë as në gjuhën angleze, as në gjuhën shqipe. E për ta sqaruar këtë dhe të mos e përdor më fjalën që e kam përdorur do ta përdor fjalën ‘decentralizim’, atë kam dashur ta them”, shprehet Fitou. 15.07.2010. Pas opinionit të GJND-së përmbyllet mbikëqyrja e pavarësisë Kryeministri i vendit Hashim Thaçi shprehu të enjten besimin para deputetëve të Kosovës se opinioni i Gjykatës Ndërkombëtare të Drejtësisë do të jetë në përputhje me vullnetin e popullit të Kosovës. Ai tha se Qeveria dhe institucionet e Kosovës i kanë bërë të gjitha veprimet në përputhje me vullnetin e qytetarëve dhe se shpallja e pavarësisë së Kosovës është bërë pas një seri negociatash dhe me ndërmjetësim të faktorit ndërkombëtarë.Për Kosovën, siç tha Thaçi do të ketë progres pas opinionit të GJND-së, ndërkohë do të shënohet edhe përmbyllja e mbikëqyrjes së pavarësisë së Kosovës.Kosovën po ashtu tha Thaçi se pas 22 korrikut, kur pritet opinioni i GJND-së, e presin njohje të reja dhe po ashtu angazhim i fuqishëm për konsolidim të institucioneve të Kosovës dhe zgjidhje të disa problemeve teknike me Serbinë.Ai foli edhe për inicimin e Projektligjin ani-mafia. Ndërsa, duke kërkuar mbështetjen e të gjithë deputetëve për këtë ligj, tha se me të pritet të parandalohet dhe goditet krimi i organizuar. Autonomi as në ëndërr Qeveria, partitë opozitare dhe shoqëria civile kundërshtojnë çdo mundësi që veriu i Kosovës të rregullohet me një autonomi të veçantë, duke e konsideruar këtë si kundër produktive dhe që bie në kundërshtim me Pakon e Ahtisaarit. Madje, në këtë çështje të gjithë palët në Kosovë kanë qëndrime të njëjta, duke konsideruar se një ide e tillë as që duhet të diskutohet madje as si opsion.Reagimi i klasës politike dhe shoqërisë civile pason deklaratën e ambasadorit të Francës në Kosovë, Jean François Fitou, i cili ka shprehur mundësinë që veriut të Kosovës t’i jepet një “autonomi e fortë”.Fitou këtë deklaratë e ka bërë në një intervistë dhënë gazetës “Zëri”. Kryeministri viziton punimet në trasenë e autostradës Kryeministri Hashim Thaçi, do të vizitojë sot punimet në trasenë e autostradës Vërmicë-Prishtinë-Merdare. Ai do të ndalet te kampi i kompanisë Bektel dhe Enka, në fshatin Zhur, për të parë nga afër rrjedhën e punimeve.Ndërsa banorë të disa fshatrave, të cilëve iu merret prona përgjatë autostradës, kanë protestuar javën e kaluar, të pakënaqur me shumën që iu ka dhënë qeveria për kompensimin e pronave. UP nesër shpall konkursin për pranimin e studentëve Nesër Universiteti i Prishtinës pritet të shpallë konkursin për pranimin e studentëve të rinj. Senati i universitetit është mbledhur sot dhe po diskuton modalitetet e konkursit edhe rreth numrit të studentëve që do të pranohen nëpër fakultet. Burime nga rektorati bëjnë të ditur se janë bërë të gjitha përgatitjet që konkursi të shpallet nesër.  14.07.2010. Askush nuk do ta rrëzojë pavarësinë e Kosovës Presidenti i Republikës së Kosovës, Fatmir Sejdiu theksoi të mërkurën se askush nuk do ta rrëzojë vendimin për pavarësinë e Kosovës dhe se pavarësia është vullnet i pakthyeshëm i qytetarëve të vendit. Këto komente Sejdiu i bëri të mërkurën pas takimit me kreun e Prishtinës, Isa Mustafa.Sejdiu duke folur për vendimin e GJND-së tha se nuk dëshiron ta prejudikojë, megjithatë sipas tij faktet që i ka ofruar Kosova në këtë institucion nuk mund t’i rrëzojë askush. Po ashtu ai ka folur për gjykata në veri, duke theksuar se është në interes të të gjithë qytetarëve vendosja e ligjshmërisë.Pas takimit me kryetarin e Prishtinës, Sejdiu theksoi se është për një zgjidhje të drejtë të Pallatit të Rinisë, që sipas tij do ta bëjnë deputetët e kuvendit komunal.Ndërkohë, kreu i Prishtinës Isa Mustafa theksoi se e ka njoftuar presidentin Sejdiu për angazhimet që ka komuna. Ai ka përmendur rëndësinë e Ligjit për Prishtinën që sipas tij, jo vetëm do t’i zgjidhë problemet e qytetarëve, por edhe të institucioneve qendrore.Ndryshe, presidenti Sejdiu vizitën në komunën e Prishtinës e realizoi në kuadër të turneut që do ta ketë nëpër qytete të Kosovës. Varady: Vendimi i GJND-së deri më 27 korrik Gjykata Ndërkombëtare e Drejtësisë do ta japë opinionin e vetë rreth ligjshmërisë së pavarësisë së Kosovës mes 22 e 27 korrikut, deklaroi Tibor Varady, i cili ka drejtuar ekipin ligjor të qeverisë së Serbisë. Për mediet serbe Varady ka theksuar se pyetja që i është shtruar Gjykatës për mendim është shumë e drejtpërdrejt dhe e tillë duhet të jetë dhe përgjigjja.Varady sqaron se Asambleja e Përgjithshme e OKB-së nuk ka detyrim të organizojë debat pas vendimit të GJND-së. Beogradi synon rinisjen e bisedimeve përmes OKB-së Pas dështimit të pritur nga Gjykata Ndërkombëtare e Drejtësisë, udhëheqësit politikë në Serbi po përgatisin një strategji nëpërmjet të cilës do të vazhdojë ta mbajnë çështjen e Kosovës problem global, në mënyrë që të ngadalësojnë ritmin e njohjes së shtetit të ri nga pjesa e mbetur e shteteve anëtare të OKB-së. Përfaqësues ndërkombëtarë bëjnë të ditur se Beogradi do të përpiqet që nëpërmjet Asamblesë së Përgjithshme të OKB-së të imponojnë rinisjen e bisedimeve për statusin e Kosovës.Sipas këtyre burimeve, Serbia në fakt ka dy variante. I pari që nëpërmjet Këshillit të Sigurimit të OKB-së të thërrasë një mbledhje të jashtëzakonshme të Asamblesë së Përgjithshme për të trajtuar qëndrimin e GJND-së. Mirëpo, kjo duket e vështirë të arrihet, duke pasur parasysh qëndrimin e tre shteteve anëtare të përhershme, SHBA-së, Britanisë, dhe Francës.Ndërsa, i dyti që këtë çështje ta fusë në sesionin e rregullt të Asamblesë që nis në gjysmën e dytë të shtatorit, ku Serbia do të prezantonte një Draft Rezolutë, nëpërmjet të së cilës do të nxiste rinisjen e negociatave për statusin e Kosovës.Mirëpo, përfaqësuesit politikë në Kosovë mohojnë kategorikisht çdo lloj alternative e cila do të bënte që mes Prishtinës dhe Beogradit të rinisin negociatat për statusin. Dedaj, zëvendësministër i Transportit Në kuadër të ndryshimeve të kabinetit qeveritar, kryeministri i Kosovës Hashim Thaçi e emëroi Gjergj Dedajn zëvendësministër të Transportit dhe Post-Telekomunikacionit, për të cilin të përditshmet kosovare shkruajnë se gjatë postit që kishte në Ministrinë e Punës dhe Mirëqenies Sociale vetëm për dy ditë qëndrimi në Vjenë të Austrisë, ka shpenzuar rreth dy mijë euro, bazuar në listën e tërheqjes së parave nga bankomatet. Ndërsa, vitin e fundit të mandatit të tij, ish zëvendës ministri Dedaj thuhet të ketë shpenzuar mbi 33 mijë euro nga kartela financiare, të cilën ministrat dhe zëvendësministrat e Qeverisë e shfrytëzojnë jashtë vendit.Këto mjete janë limiti që një zëvendësministër do të mund t’i harxhonte gjatë udhëtimeve zyrtare, ndërsa ish zëvendësministri Dedaj i ka shpenzuar ato në maksimum për secilin muaj.Ish zëvendësministri Dedaj ka sugjeruar gazetën Koha Ditore që të mos shkruajë për të, pasi që ka vlerësuar se deri në fund të vitit ka kohë, kur sipas tij priten të bëhen bilancet dhe të shihet kush ka shpenzuar më shumë nga zyrtarët qeveritarë për udhëtime zyrtare jashtë vendit.Kryetari i PLK-së, Gjergj Dedaj deri para rreth dy muajsh ishte zëvendësministër i Punës dhe Mirëqenies Sociale, ndërsa tashmë sipas RTK-së kryeministri i Kosovës Hashim Thaçi e emëroi Gjergj Dedajn zëvendësministër të Transportit dhe Post-Telekomunikacionit, që udhëhiqet nga ministri Fatmir Limaj. 13.07.2010. Admirali Fitzgerald viziton Kosovën Komandanti i Forcave të Përbashkëta Aleate të Komandës në Napoli, admirali Mark Fitzgerald , do të vizitojë sot Kosovën. Fizxherald do të vizitojë Shtabin qendror të KFOR it, ndërkaq pasdite, me gjeneralin Markus Bentler, do të mbajnë një konferencë për media. Batiq flet për ndarjen e Kosovës Deputeti dhe kryetari i Partisë Demokristiane të Serbisë, Vladan Batiq, ka deklaruar se Serbia, nëse i ofrohet ndarja e Kosovës, duhet të kërkojë që pjesa veriore t’i bashkangjitet Serbisë.Ai ka thënë se enklavat e mëdha serbe dhe manastiret në Kosovë duhet të eksteritorializohen dhe praktikisht të jenë nën juridiksionin e Serbisë, njofton gazeta serbe Blic. Duhet bërë propozime të realizueshme, dhe të mos jetohet më me mite dhe legjenda, ka thënë Batiq. EULEX arreston një këshilltar të MSH-së Ilir Tolaj ish sekretar permanent i Ministrisë së Shëndetësisë, ndërsa aktualisht këshilltar politik i ministrit Bujar Bukoshi u arrestua të martën në Prishtinë, në kontekst të një hetimi penal për shmangie tatimi. EULEX-i përmes një njoftimi për media njofton se arrestimin e ka kryer Policia e EULEX-it dhe policët e Kosovës që janë pjesë e Task Forcës Anti-Korrupsion. EULEX megjithëse nuk njofton për të arrestuarin, mediat kosovare theksojnë se i arrestuari është ish sekretari permanent i MSH-së, Ilir Tolaj, aktualisht këshilltar politik në këtë ministri.Lidhur me këtë rast janë kryer bastisje në tri lokacione në Prishtinë, përfshirë një zyrë në Qendrën Klinike Universitare në Prishtinë. Bastisjet janë autorizuar nga një gjyqtar i EULEX-it i procedurës paraprake.Hetimet janë duke u kryer nga Policia e EULEX-it nën mbikëqyrje të zyrës së Prokurorisë Speciale. Në pritje të rezultateve nga Rashka As autoritetet kosovare e as ato të EULEX-it nuk kanë njohuri se kur do të jenë të gatshme rezultatet e mostrave të dheut të nxjerra në Rashkë, mirëpo nga Prokuroria për krime lufte në Beograd mësohet se, rezultatet e mostrave të dheut pritet të jenë të gatshme brenda dhjetë dite. Sipas burimeve të së përditshmes Zëri, nga Prokuroria për krime lufte në Beograd, rezultatet e mostrave të dheut pritet të jenë të gatshme brenda dhjetë ditësh.Rezultatet e këtyre analizave pritet të hedhin dritë mbi mundësinë e ekzistimit të një varreze masive në rajonin e Rashkës në Serbi, ku dyshohet të jenë varrosur trupat e pajetë të qindra shqiptarëve të vrarë gjatë luftës. 12.07.2010. Presidenti Sejdiu mban fjalimin vjetor Presidenti Fatmir Sejdiu sot mban fjalimin vjetor para deputetëve të Kuvendit të Kosovës, ku do të paraqesë punën e tij brenda periudhës 1 vjeçare. Ndërkaq, Kuvendi sot shqyrton për herë të dytë rishikimin e buxhetit për gjashtë muajt e ardhshëm. Ne rend ditë është edhe shqyrtimi i projektligjit për Bankën Qëndrore si dhe ndryshimin e ligjit për tatimin e normës së akcizës. Thaçi - Djukanovic, drekë në Budvë Kryeministri Hashim Thaçi dhe kryeministri malazez Milo Djukanovic kanë pasur një drekë të përbashkët në Budvë. Ata kanë diskutuan për raportet bilaterale, bashkëpunimin rajonal, si dhe për demarkacionin e vijës kufitare mes dy shteteve. Dreka u shtrua, një ditë pas vizitës së presidentit serb Boris Tadic në Mal të Zi. Kryeministri i Kosovës Hashim Thaçi dhe ai malazez Milo Djukanovic, kanë zhvilluar një takim kokë më kokë, të dielën në Budvë, gjatë të cilit kanë biseduar për zgjerimin e bashkëpunimit mes dy shteteve.“Gjatë drekës, është diskutuar për raportet bilaterale, bashkëpunimin rajonal dhe rëndësinë e thellimit të bashkëpunimit. Po ashtu është diskutuar edhe për fillim sa më të shpejtë të demarkacionit të vijës kufitare mes dy shteteve”, ka thënë Memli Krasniqi, zëdhënës i Qeverisës së Kosovës. Asnjë nga vendet e BE-së nuk është për ndarje Shefi i Delegacionit të Bashkimit evropian në Serbi, Vincent Degert, ka thënë se ndarja e Kosovës nuk është në rend dite të BE-së, duke qenë se asnjë nga vendet anëtare nuk e dëshiron ndarjen. “Asnjë nga vendet anëtare nuk është për ndarje, sepse kanë frikë se kjo do të kishte domino-efekt në regjion, por edhe në botë. Duhet punuar për të gjetur një zgjidhje afatgjate, të qëndrueshme dhe paqësore”, ka thënë Degert në një intervistë për FoNet.Ai ka thënë se ekzistojnë shumë ide të cilat duhet të dëgjohen për mënyrën se si të zgjidhet kjo çështjeje, sipas modelit të Gjermanisë, Italisë, Austrisë, Britanisë së Madhe dhe Irlandës Veriore, apo Suedisë dhe Finlandës.Degert mendon se në këtë moment është e nevojshme që të ndërpriten të gjitha provokimet të cilat po ngjajnë në terren, siç ishin ato të rasteve të fundit në Mitrovicë. 10.07.2010. Tadic: Rexhepi po kërcënon me luftë Presidenti i Serbisë, Boris Tadic thotë se Bajram Rexhepi, ministër i Punëve të Brendshme në Kosovë, haptas po kërcënon me luftë kur deklaron se do të dërgojë Njësitë speciale të policisë në Mitrovicë. Siç transmeton RTS-ja një komunikatë të presidentit serb, Tadic thotë se “Institucionet e Kosovës do të jenë përgjegjëse për pasojat katastrofale të zbatimit eventual të këtij kërcënimi”.Duke i quajtur luftënxitëse deklaratat si të ministrit Rexhepi, presidenti serb Tadic e ka vlerësuar demantin e EULEX-it për mbështetjen e planit për dërgimin e Njësive speciale në veri.Ndërkaq i ashtuquajturi ministër për Kosovën në Qeverinë e Serbisë, Goran Bogdanovic, sipas RTS-së, paralajmërimin e Bajram Rexhepit për dërgim forcash speciale të policisë në pjesën veriore të Mitrovicës, për të vendosur atje rendin dhe qetësinë, e ka quajtur “rënie maskash”. Franca kërkon fillimin e dialogut Prishtinë-Beograd Kryeministri i Francës, Francois Fillon shpreson që pas mendimit këshillëdhënës të Gjykatës Ndërkombëtare të Drejtësisë lidhur me ligjshmërinë e shpalljes së Kosovës, do të nisë gradualisht dialogu ndërmjet Beogradit dhe Prishtinës. Fillon, në margjinat e konferencës ndërkombëtare të liderëve të Evropës dhe Amerikës Veriore “Samiti i Kroacisë 2010” në Dubrovnik, ka shfaqur shpresën e tij se vendimi që pritet të japë GJND-ja do të lehtësojë vënien e dialogut gradual në mes të Beogradit dhe Prishtinës, transmeton agjencia Frace Press.Fillon ka thënë se të gjitha shpresojnë që ky dialog do të sjellë qetësi në këtë pjesë të Evropës, pasi që sipas tij, ai do të forconte stabilitetin e Ballkanit Perëndimor, ngase nevojitet që të vazhdohet me afrimin e Serbisë dhe të Kosovës me Bashkimin Evropian. Serbia nuk mund ta mbaj peng drejt BE-së rajonin thotë Hyseni Serbia nuk mund ta mbajë peng avancimin drejt BE-së të të gjithë rajonit për një kohë të gjatë dhe unë besoj se do të vijë dita shpejt, kur edhe do t’i thuhet Serbisë qartë kjo gjë, tha ministri i Punëve të Jashtme, Skënder Hyseni. Ministri Hyseni, që mori pjesë në takimin e Kartës së Adriatikut, thotë se me këtë pjesëmarrje, Kosovës po i jepet perspektivë e prekshme euro-atlantike.Ju e dini që Karta e Adriatikut, e themeluar shtatë vjet më parë, me nismën e sekretarit të atëhershëm të Shtetit, Kolin Pauell, dhe me nënshkrimin që atëherë patën dhënë tre ministra të Jashtëm të vendeve të Ballkanit, si: Shqipëria, Kroacia dhe Maqedonia, kjo ishte menduar si një strukturë rajonale që do të përshpejtonte dhe lehtësonte integrimet e Ballkanit Perëndimor në NATO.Me këtë, Kosovës po i ofrohet njëfarë perspektive e prekshme, më e kapshme, euro-atlantike. Natyrisht, unë e kam shfaqur qëllimin e Kosovës për t’u bërë anëtare e plotë e kësaj strukture sa më parë që të jetë e mundur. Ndërron jetë bashkëshortja e ministrit Limaj Zahrije Limaj, bashkëshortja e ministrit të Transportit dhe Postë-Telekomunikacionit, Fatmir Limaj ka ndërruar jetë pas një sëmundje. Bëhet e ditur se gruaja e ministrit Fatmir Limaj, ka vdekur pas një sëmundje të rëndë, ndërsa varrimi i të ndjerës bëhet në Banjë të Malishevës. 09.07.2010. Pas GJND-së, nuk do të ketë bisedime për statusin Raportuesja për Kosovën në Parlamentit Evropian, Ulrike Lunacek ka thënë se pavarësisht mendimit të GJND-se, nuk do të ketë bisedime rreth statusit e as për ndarjen e Kosovës. Sponzoruesja e një Rezolute të miratuar nga Parlamenti evropian për vendin tonë Lunacek, tha se kjo është “një po” e fortë për integrimin e Kosovës së pavarur në Bashkimin Evropian.Ajo tha se Rezoluta kërkon fillimin e menjëhershëm të dialogut për liberalizimn e vizave për Kosovën dhe bën të qartë faktin se pas vendimit të GJND-së lidhur me legalitetin e pavarësisë së Kosovës, pavarësisht nga çfarëdo mendimi, nuk guxon të ketë ndarje të Kosovës apo bisedime për çështje të statusit si dhe as për çfarëdo këmbimesh të territorit. Blair: Kosova është çështje e zgjidhur Ish-kryeministri i Britanisë së Madhe, Tony Blair, të enjten, gjatë një konference për shtyp që pati pas takimit me kryeministrin Hashim Thaçi, në Prishtinë deklaroi se tani sfidë për Kosovën është zhvillimi i kapaciteteve ekonomike në mënyrë që të sigurohet vendi i saj në organizatat e Bashkimit Evropian (BE), raporton RTK.Ai tha se ka kënaqësinë që sërish vjen në Kosovë, por që tani në shtetin e pavarur e që sipas tij, përparimi nganjëherë mund të duket i ngadalshëm. Blair tha se është shumë i prekur me zemërgjerësinë e kosovarëve dhe zemërgjerësinë e popullit të Kosovës, sepse ai tha se kudo që gjenden shqiptarë dhe i takon ata ka një ndjenjë për ta.Blair tha se fakti që Kosova është e pavarur është mirë, do të ishte absurde lejimi i spastrimit etnik që ka ndodhur vjet më parë, e që kjo është provuar në shumë shtete por nuk ka pasur asnjëherë sukses. “Evropa mund të ofrojë një perspektiv por edhe shtetet duhet ta arrijnë vet”, tha ai.Ndërkaq kryeministri i vendit Hashim Thaçi, tha se Blairi është miku i tij dhe Kosovës, një lider i përmasave botërore. Ai falënderoi ish kryeministrin britanik për ndihmën që i ka dhënë vendi dhe populli i tij Kosovës. 08.07.2010. Kosova të njihet nga të gjitha vendet e BE-së Parlamenti Evropian me shumica votash ka miratuar Rezolutën për Kosovën, me anë të të cilës ftohen vendet anëtare të cilat nuk e kanë njohur pavarësinë e Kosovës, që ta bëjnë atë. Rezoluta, në të cilën thuhet se PE do të përshëndeste kur të gjitha vendet anëtare të BE-së do ta njihnin pavarësinë e Kosovës, e kanë mbështetur 455 deputetë, ndërsa rreth 150 e kanë kundërshtuar atë.Deri më tani pavarësinë e Kosovës e kanë pranuar 22 vende anëtare të BE-së, ndërsa vetëm pesë prej tyre nuk e kanë bërë ende.Në mënyrë që politika evropiane të jetë efikase për të mirën e të gjithëve në Kosovë, vendet anëtare të BE-së duhet ta forcojnë qasjen e përbashkët ndaj Kosovës- potencohet në Rezolutën, të cilën e ka përgatitur deputetja austriake, Ulrike Lunacek. Filloi puna në varrezën masive në Rudnicë Zëvendësprokurori për krime të luftës i Serbisë, Bruno Vekaric, tha se hetuesit e kanë filluar punën në një varrezë masive, që besohet se përmban më se 250 trupa të pajetë të shqiptarëve të Kosovës, të vrarë gjatë luftës në vitet 1998-99. Ai theksoi se gjyqtarët hetues po e analizojnë terrenin në Rudnicë, në pjesën jugore të Serbisë, afër kufirit me Kosovën.Zëvendës prokurori Vekaric tha se hetimi ka filluar të enjten dhe nëpërmjet tij do të përcaktohet nëse trupat janë varrosur në atë hapësirë, e cila ishte raportuar nga dëshmitarët.Sipas tij, do të pasojë edhe zhvarrosja.Prokurorët e Serbisë besojnë se trupat e pajetë janë varrosur nën një ndërtesë dhe një vendparkim në fshatin Rudnica, pasi kufomat ishin sjellë aty nga Kosova, për t’i fshehur mizoritë e kryera gjatë luftës. Rexhepi: Në veri do të instalohet ligji pavarësisht protestave  Ministri i Punëve të Brendshme i Kosovës, Bajram Rexhepi, është zotuar se në Mitrovicë do të instalohen rendi dhe ligji, me gjithë përpjekjet e Beogradit për ta destabilizuar gjendjen në këtë qytet. Në një intervistë për “Kohën Ditore”, e cila do të botohet e plotë të premten, Rexhepi ka vlerësuar se kështu Serbia synon të përfitojë politikisht duke u përpjekur "të argumentojë" se Kosova nuk është në gjendje të vërë rend dhe ligj.“Para opinionit të GJND-së ka pasur interes të ndodhë ky tensionim. Kemi pasur do informacione paraprake se janë të interesuar ta tensionojnë situatën, si pretekst e kanë shfrytëzuar hapjen e Zyrës për regjistrim civil, në të cilën edhe Ministria e Pushtetit Lokal ka një prezencë të vogël në ekipin përgatitor për komunën në veri, dhe ata e kanë shfrytëzuar si një pretekst dhe është tensionuar pak gjendja”, ka thënë Rexhepi.Sipas tij, hapja e Zyrës civile të Qeverisë së Kosovës është pjesë e strategjisë për veriun. Ai ka thënë se kjo zyrë nuk do të mbyllet "pavarësisht protestave të serbëve". Ministri Rexhepi është tërhequr nga zotimi i së premtes së kaluar kur ndodhën protestat në veri, se zyra do të mbahet e hapur "me çdo çmim".“Po, çmimi ndoshta është fjalë e rëndë, por pavarësisht protestave”, shprehet ai.  Blair arrin sot në Prishtinë Ish-kryeministri britanik Tony Blair të enjten fillon vizitën dyditore në Kosovë, me ftesë të kryeministrit Hashim Thaçi. Blair do të marrë pjesë në një sërë aktivitetesh, duke përfshirë edhe takimet me liderët institucionalë, ndërsa do të mbajë një fjalim edhe në Kuvendin e Kosovës.Qeveria e Republikës së Kosovës po ashtu do të organizojë me 9 korrik, një ngjarje publike në Teatrin Kombëtarë, si mundësi që ish kryeministri britanik të takohet me qytetarë të Kosovës. Në ditën e parë të vizitës së tij thuhet se Blair do ta marrë titullin “Doctor Ho-noris Causa” nga Universiteti i Prishtinës, ndërsa do të vizitojë komunën e Graçanicës.Ndryshe, thuhet se janë bërë të gjitha përgatitjen për ardhjen e Blairit në Kosovë, ndërsa Prishtina është mbushur me afishet me fytyrën e tij, në të cilat shkruan “Mik, hero...”.Në fund të mandatit të tij si kryeministër i Britanisë, Tony Blair kishte thënë se besonte që Kosova ishte ndër sukseset më të mëdha të karrierës së tij dhe se mendonte që kishte bërë atë që ishte më se e drejtë. OKB tenton të jetë pjesë e dialogut teknik Kosovë-Serbi Ban Ki-Moon tenton që OKB të bëhet pjesë e dialogut teknik mes Kosovës dhe Serbisë. Ai i ka shkruar një letër kryediplomates evropiane Catherine Ashton, me sugjerimin që pas GJND-së, emisari i tij Lamberto Zannier të përfshihet në këtë proces. Qeveria e Kosovës është plotësisht kundër. Prishtina kërkon dialog me lehtësim të BE-së dhe SHBA-së. Gazeta Express ka siguruar nga burime ndërkombëtare kopjen e letrës së Ban Ki-Moonit drejtuar baroneshës Ashton, që mban datën 24 qershor.Jam i inkurajuar me rezultatet e bashkëpunimit mes OKB-së dhe BE-së në Kosovë. Përpjekjet tona të përbashkëta kanë çuar në rirreshtim të dukshëm të pranisë së bashkësisë ndërkombëtare në Kosovë dhe situata ka mbetur përgjithësisht stabile”, fillon letra e kreut të Kombeve të Bashkuara.Megjithatë, ai shkruan se në Kosovë ka sfida, por edhe me ndikime më të gjera në sferën ndërkombëtare. Kjo gjendje, sipas tij, do të kërkojë një qasje koherente dhe gjithëpërfshirëse nga aktorët ndërkombëtarë të përfshirë në Kosovë.Ban Ki-moon jep edhe këshilla se kur është koha më e përshtatshme që të kërkohet mënyra për t’u zgjidhur problemet e mbetura në Kosovë. “Periudha pas publikimit të opinionit këshillëdhënës të Gjykatës Ndërkombëtare të Drejtësisë mund të jetë një rast i volitshëm për të hulumtuar se si është më së miri të adresohen sfidat e mbetura”, thuhet në letrën e tij. Lunaçek u bënë thirrje 5 shteteve anëtare të BE-së ta njohin Kosovën Deputetja e Parlamentit Evropian, Ulrike Lunaçek, u bënë thirrje 5 shteteve anëtare të Bashkimit Evropian, që ta njohin pavarësinë e Kosovës.Debati për Kosovën në selinë e Parlamentit Evropian në Strazburg, ka kaluara në dritën e raportit të deputetes Ulrike Lunacek, që u bënë thirrje 5 shteteve anëtare të BE-së, që ta njohin pavarësinë e Kosovës. Lunaçek shpreson që sot ky raport të gjej përkrahjen e shumicës së kolegëve për tu miratuar si rezolutë. Në anën tjetër Komisionari për zgjerim i BE-së, Shtefan Fyle, konfirmoi gjatë debatit se Kosova ka perspektivë evropiane si të gjitha vendet e rajonit. 07.07.2010. Beogradi të distancohet nga inspirimi i dhunës Kryeministri i Republikës së Kosovës Hashim Thaçi në mbledhjen e qeverisë e vlerësoi mjaft dinjitoze paraqitjen e ministrit të Punëve të Jashtme Skënder Hyseni në mbledhjen e djeshme të Këshillit të Sigurimit, duke theksuar se ka bërë një prezantim praktik, në përputhshmëri me agjendën e shtetit. Kreu i ekzekutivit kosovarë me këtë rast kërkoi nga Beogradi që të distancohet nga inspirimi i dhunës.“Është me interes për të gjithë që Beogradi të largohet dhe të distancohet nga inspirimi i dhunës dhe njerëzve të dhunës në këtë pjesë të territorit, sepse për ne ka qenë dhe është e papranueshme gjendja që ekziston, por në të njëjtën kohë pavarësisht nga opinioni i GJND-së për Kosovën do të ketë vetëm konsolidim dhe fuqizim të shtetit. Statusi është përmbyllur njëherë e përgjithmonë dhe njohjet do të vazhdojnë dhe integriteti territorial i Kosovës është i pa cenueshëm”, u shpreh kryeministri. Serbia doli humbëse në Këshillin e Sigurimit Ministri i Punëve të Brendshme, Bajram Rexhepi, ka thënë se thirrja e KS-së nga Serbia nuk është bërë për të prezantuar gjendjen reale në terren, por me qëllimin që të dërgojë mesazhe politike para vendimit të GJND-së se Kosova nuk është stabile. Ai ka thënë se debati ka qenë një dështim i iniciativës serbe për arsye se edhe ato vende që nuk e kanë njohur Kosovën në një mënyrë e kanë dënuar incidentin, ashtu që, sipas tij, Serbia ka dalë humbëse në këtë mbledhje të Këshillit të Sigurimit.Nga ana tjetër, Rexhepi ritheksoi edhe një herë përkushtimin e institucioneve për të vënë rendin dhe ligjin në pjesën veriore të Mitrovicës, ndërsa ka paralajmëruar se do të ketë shkarkime të oficerëve të policisë që nuk përfillin hierarkinë e institucioneve të Republikës së Kosovës. Blair të enjten në Prishtinë Ish-kryeministri britanik Tony Blair të enjten do të qëndrojë për vizitë dyditore në Kosovë, me ftesë të kryeministrit Hashim Thaçi. Zëdhënësi i Qeverisë, Memli Krasniqi, ka thënë se Blair do të marrë pjesë në një sërë aktivitetesh, duke përfshirë edhe takimet me liderët institucionalë, ndërsa do të mbajë një fjalim edhe në Kuvendin e Kosovës.Në ditën e parë të vizitës së tij, Blair do ta marrë titullin “Doctor Ho-noris Causa” nga Universiteti i Prishtinës, ndërsa në ditën e dytë, do të vizitojë Prizrenin dhe Pejën.Krasniqi ka bërë të ditur se janë bërë të gjitha përgatitjen për ardhjen e Blairit në Kosovë, ndërsa Prishtina është mbushur me afishet me fytyrën e tij, në të cilat shkruan “Mik, hero...”. Beogradi t’i lë të qetë serbët e Kosovës Këshilli i Sigurimit i Kombeve të Bashkuara në Nju Jork ka mbajtur dje një mledhje të jashtëzakonshme, e thirrur nga presidenti serb Boris Tadiq, për zhvillimet e fundit në veri të Mitrovicës.Në fjalimin e tij, ministri i jashtëm i Republikës së Kosovës Skender Hyseni i bëri thirrje presidentit serb Boris Tadiq që të lë anash të kaluarën dhe të punojë për të ardhmen e serbëve në Kosovë.Lini serbët rehat, punoni me ne si autoritete të Kosovës, në shërbimin e tyre , bisedoni për aq shumë gjëra praktike, të cilat do të ndikonin në mirëqenjen e komunitetit serb. Askush nuk duhët të shpërblejë dhunën. Tregimet fantastike të engjuve dhe demonëve duhet të ndalohen, sepse ska as engjuj as demon në Ballkanin Perendimor, mijëra engjuj në Bosnje e Kosovë janë vrarë këto storje duhet të ndalohen për të mirën e së ardshmes pasi ne e dime mirë se kush ka shkaktuar luftrat më të mëdha në ish Jugosllavi” , tha Skenderi.Ndërkaq në fjalimin e tij drejtuar anëtarëve të Këshillit të Sigurimit, presidenti serb Boris Tadiq tha se Serbia nuk ka zgjidhje tjetër por të rivlerësojë marrëdhënjet e saj me përfaqesuesit ndërkombëtarë në Kosovë, vetëm nëse faktorët ndërkombëtarë mohojnë përkrahjen e mëtutjeshme për aktet destabilizuese të Prishtinës, duke aluduar në komunitetin shqiptar.Zanier tha se situata e sigurisë është më e tensionuar se zakonisht duke përmendur plagosejen e anëtarit serb të Parlamentit të Kosovës. Ai kërkoi shmangje të dhunës dhe sipas tij ngjarjet e fundit e rrisin nevojën për bisedimet teknike me Serbinë. Ndërkaq kreu i Misionit të EULEx-it Ive de Kermabo tha se ky mision denon dhunën ne veri të Mitrovicës.Ai tha se Stafi i Eulexit ka qenë i kërcënuar nga individë të caktuar në veri të Kosovës dhe kjo sipas tij është e papranueshme. Kermabo hodhi poshtë spekulimet e mediave se ka pasur kërcënim të përkeqesimit të situatës në veri apo në tërë Kosovën. Eulexi do vazhdojë punën dhe do ta dëshmojë para Prishtinës dhe Beogradit dhe i ftojmë ato të na përkrahin në implementimin e mandatit tonë, tha Kermabo. PE diskuton për Kosovën dhe Shqipërinë Parlamenti Evropian zhvillon të mërkurën një debat midis deputetëve dhe përfaqësueses së lartë të BE-së, Catherine Ashton për Kosovën dhe Shqipërinë. Për të dy vendet do të votohet më 8 korrik nga një rezolutë. Nikolaos Chountis, nga e Majta e Bashkuar Evropiane, ka marrë pjesë në përgatitjen e projektrezolutës për Shqipërinë.Në një intervistë për Deutsche Welle ai ka thënë se rezoluta është përpiluar në konsensus me të gjitha grupet politike të Parlamentit Evropian.Mendimi im është se ne duhet të ndihmojmë shqiptarët të vazhdojnë të hedhin hapat e duhur në drejtim të demokracisë për t`iu afruar sa më shumë Bashkimit Evropian. E dyta është se ne jemi dakord me liberalizimin e vizave, i cili duhet të bëhet sa më shpejt të jetë i mundur...”, është shprehur Chountis.Chountis pret që projektrezoluta të aprovohet dhe shpreson që ajo të sjellë diçka të re për njerëzit në Shqipëri. Ai beson se ajo do të jetë mbështetje për të bërë hapat e duhur për vendin drejt BE.Sa i përket projektrezolutës për Kosovën, do të theksohet se vendet e BE-së duhet të shtojnë kontaktet me Kosovën. Parlamentarët evropianë "mirëpresin njohjen nga të gjitha vendet e BE-së të pavarësisë së Kosovës", thuhet në projektrezolutën e përgatitur nga Komisioni i Politikës së Jashtme. Vendet e BE-së që nuk e kanë njohur ende Kosovën janë Qipro, Greqia, Rumania, Sllovakia dhe Spanja. 06.07.2010. Këshilli i Sigurimit mblidhet për situatën në Kosovë Këshilli i Sigurimit të Organizatës së Kombeve të Bashkuara mblidhet të martën për të diskutuar situatën në Kosovë. Autoritetet e Beogradit po përpiqen të shënojnë një fitore diplomatike, disa ditë para se Gjykata Ndërkombëtare e Drejtësisë të thotë fjalën e saj për legjitimitetin e shpalljes së pavarësisë së Kosovës. Disa orë pas protestave të dhunshme në veri të Mitrovicës të enjten e shkuar, ku mbeti i vrarë një mjek, presidenti i Serbisë, Boris Tadic kërkoi nga Këshilli i Sigurimit të mblidhet urgjentisht për të shqyrtuar situatën në Kosovë.Presidenti i Serbisë ka deklaruar se bota duhet të reagojë. “Serbia edhe njëherë po ballafaqohet me sfida të mëdha në Kosovë. Qytetarët tanë në Kosovë janë sulmuar”, shtoi Tadic. Kërkesa e Serbisë u pranua menjëherë nga Kryesuesi i radhës së Këshillit të Sigurimit, Ambasadori i Nigerisë.Ndërkaq, Kosovën në Nju Jork do ta përfaqësojë, ministri i Jashtëm, Skender Hyseni. Ky diskutim në OKB, vjen në momentin kur është hedhur ideja e shkëmbimit të territoreve mes Kosovës dhe Serbisë. Sejdiu nderohet nga “Rotary Club” Në dhjetëvjetorin e themelimit të “Rotary Club” të Gjakovës, presidenti i Republikës së Kosovës, Fatmir Sejdiu u nderua me titullin “Anëtar nderi i përjetshëm” i këtij klubi. Po ashtu, me këtë titull u nderuan shefi i ICO-së Peter Feith, komandanti i KFOR-it Gjenerallejtënant Markus Bentler dhe Gjeneral Sato. Në njoftimin për media të Presidencës, thuhet se presidenti Sejdiu theksoi se është nder i veçantë që të jetë anëtar i “Rotary Club’ dhe të jetë bashkëveprimtar i idesë që ka ky klub, që të jetë me gjithë veprimtarinë e tij në shërbim të të gjithë qytetarëve të Kosovës.Më gëzon fakti se Kosova vërtet për një kohë shumë të shkurtë ka arritur të krijoj dhjetë klube të Rotarisë, me njerëz të përkushtuar në këtë asocim kaq të qëlluar dhe të njëjtën kohë përmes veprimtarisë së tyre kanë zënë shumë miq anekënd botës, duke dhënë të njëjtën kohë mesazhe të mira për punën që bëjnë njerëzit e Kosovës dhe duke dhënë mesazhe të mira të afrisë dhe miqësisë mes vendeve”, shtoi Sejdiu. Thaçi merr pjesë në samitin e Dubrovnikut, mungon Tadic Me datën 9 dhe 10 korrik në Dubrovnik do të mbahet samit i pestë i Kroacisë. Në këtë samit do të marrë pjesë edhe kryeministri i Kosovës Hashim Thaçi, i cili është ftuar nga kryeministrja kroate Jadranka Kosor. Ndërkaq, ashtu si në samitin e Berdos i cili ishte organizuar nga Sllovenia, presidenti i Serbisë Boris Tadic ka paralajmëruar se nuk do të marrë pjesë as në samitin e Dubrovnikut për shkak të pjesëmarrjes së kryeministrit të Kosovës Hashim Thaçi. Njoftimi bëhet i ditur nga gazeta kroate ”Jutarnji list”.Bëhet e ditur që në samitin e pestë kroat në Dubrovnik, kryeministrja e Kroacisë ka ftuar edhe shumë homologë të saj nga vende të Ballkanit Perëndimor dhe Bashkimit Evropian.Mes të ftuarve do të jenë edhe kryeministri italian Silvio Berluskoni, kryeministri francez Fransoa Filon, kryeministri polak Donald Tusk, kryeministri bullgar Bojko Borisov, ndërsa do të jenë të pranishëm edhe kryeministrat e vendeve të Ballkanit, ai i Bosnjë e Hercegovinës, Malit të Zi, Kosovës, Maqedonisë dhe Shqipërisë.Ndryshe, samiti i Dubrovnikut do të shqyrtojë çështje politike që kanë të bëjnë me bashkëpunimin ekonomik dhe atë të sigurisë në Evropën juglindore, si dhe çështje të politikës globale dhe mënyrave për të dalë nga recesioni ekonomik. 05.07.2010. Sejdiu: Të kota përpjekjet e Serbisë për të demonstruar destabilitet Presidenti i vendit, Fatmir Sejdiu theksoi të hënën se Serbia, si gjithmonë ka bërë përpjekje për të demonstruar se Kosova nuk mund të jetë një vend i qëndrueshëm dhe stabil, por sipas presidentit do ta ketë të kotë sepse qytetarët e vendit janë akterë të rëndësishëm në stabilitetin e përgjithshëm dhe në të njëjtën kohë, aktet e dhunës janë dënuar sepse nuk janë rrugë që mund të ndihmojnë ecjen dhe zhvillimin e vendit. Presidenti Sejdiu duke iu përgjigjur pyetjeve të gazetarëve lidhur me mbledhjen e Këshillit të Sigurimit, e thirrur nga Serbia, nëse do të dërgojë një imazh jo të mirë për Kosovën pas ngjarjeve në Mitrovicë theksoi se ka edhe të atillë që dëshirojnë ta prishin imazhin e mirë të përgjithshëm të vendit.Nuk duam të paragjykojmë se cili do të jetë akteri për tërë atë që ka ndodhë, organet e hetuesisë duhet ta bëjnë punën e vet dhe jemi të vetëdijshëm se ata që ia duan të mirën Kosovës nuk e kanë bërë një gjë të tillë. E dimë se Serbia, si gjithmonë deri tash ka bërë përpjekje që të gjejë grimca të caktuara sipas saj për të demonstruar se Kosova nuk mund të jetë një vend i qëndrueshëm dhe stabil, por do ta ketë të kotë...”, tha Sejdiu. Biserko: Pritet valë e re e njohjeve të Kosovës Sonja Biserko, kryetare e Këshillit të Helsinkit në Beograd vlerëson se Kosova brenda disa muajve, mund të bëhet anëtare e Kombeve të Bashkuara dhe do të shkohet drejtë konsolidimit të integritetit territorial dhe pavarësimit të plotë të Kosovës. Në një intervistë për Radion Evropa e Lirë, Biserko thekson se pas vendimit të GJND-së, do të ndryshohet qëndrimi i bashkësisë ndërkombëtare, pasi që pritet valë e re e njohjeve të Kosovës.Biserko duke komentuar faktin që nuk është zgjuar vetëdija e njerëzve që kanë bartur kufomat, që kanë hapur varrezat dhe që i kanë gjuajtur viktimat në to gjatë luftës në Kosovë theksoi “Mendoj se kemi të bëjmë me krim kolektiv, në të cilin kanë marrë pjesë shumë njerëz. Gjatë intervenimit (të NATO-s) flitej: tash duhet përfunduar punën me shqiptarët. Ka pasur një pajtueshmëri në heshtje të asaj që ka ndodhur”.Ajo vlerësoi se vetëm kur kanë filluar të arrijnë kufomat e të rinjve nga Serbia, gjërat kanë filluar të lëvizin.Sipas saj, tash 10 vjet, që kur Kosova nuk është nën kontrollin e Serbisë, nuk ka asnjë rrëfim pozitiv për atë se si jetohet në Kosovë, madje nuk ka as për serbët.Mendoj se qytetarët e Serbisë janë të privuar nga informatat e vërteta se si jetohet në Kosovë dhe se janë pengje të një stereotipi për shqiptarët, sipas të cilit, këta njerëz nuk mund të krijojnë shtetin, janë inferiorë, nuk kanë merituar të kenë shtetin dhe aq më pak t’i kenë amerikanët në anën e tyre”, shprehet ndër të tjera, Biserko. Gjendja e sigurisë në Kosovë vlerësohet stabile Kryeministri i Republikës së Kosovës, Hashim Thaçi dhe komandanti suprem i Forcave të Përbashkëta për Evropën të NATO-s, admirali Xhejms Stavridis e vlerësuan përgjithësisht stabile gjendjen e sigurisë në Kosovë. Në njoftimin e Kryeministrisë thuhet se temë bosht e takimit ishte gjendja aktuale politike dhe e sigurisë në Kosovë, progresi i arritur në Kosovë dhe thellimi i bashkëpunimit me NATO-n. Kryeministri i Republikës së Kosovës, Hashim Thaçi në takim shprehu mirënjohjen e lartë për kontributin substancial që ka dhënë Aleanca Veri-atlantike në ngritjen dhe fuqizimin e Forcës së Sigurisë të Kosovës, një forcë që është duke u zhvilluar gjithnjë e më shumë sipas standardeve më të larta të NATO-s. Gjendja e sigurisë në Kosovë nga dy bashkëbiseduesit u vlerësua përgjithësisht stabile, ndërsa kryeministri Thaçi vlerësoi rolin e KFOR-it në ruajtjen e paqes dhe stabilitetit në Kosovë. “Reduktimi i trupave të KFOR-it në Kosovë dëshmon se gjendja e sigurisë çdo ditë e më tepër është stabile dhe se institucionet e Kosovës janë të gatshme të marrin përgjegjësitë që iu takojnë për sigurinë e vendit”, u shpreh kryeministri Thaçi.   Tri rrëfime në Nju Jork   Në Këshillin e Sigurimit do të prezantohen tri rrëfime të ndryshme për incidentin tragjik në veri të Mitrovicës. Versionin e parë do ta japë përfaqësuesi i OKB-së, të dytin Boris Tadic, të tretin Skënder Hyseni. Autoritetet kosovare besojnë se shpërthimi mund të jetë shkaktuar nga pakujdesia, ose qëllimisht, nga ndonjë protestues serb.Në mbledhjen e jashtëzakonshme që do të mbahet të martën në Nju Jork, për ngjarjen në Mitrovicë fillimisht do të flasë një përfaqësues i OKB-së nga Departamenti për Operacione Paqeruajtëse (DPKO), kanë thënë burime të gazetës Express.Përfaqësuesi i DPKO-së është ftuar të njoftojë ambasadorët për incidentin tragjik në Mitrovicë nga kryesuesja e radhës së Këshillit të Sigurimit, ambasadorja nigeriane, Joy Ogwu. Ajo nuk ka ftuar shefin e UNMIK-ut, Lamberto Zannier, mirëpo, zyrtari i OKB-së do të sjellë informacion duke u bazuar në të dhëna të cilat janë dërguar në Nju Jork nga UNMIK-u.Ndërkaq, versioni serb që do të prezantohet nga Tadic, tashmë është bërë i njohur. Për incidentin ai ka fajësuar jo vetëm institucionet e Kosovës, por edhe përfaqësuesin e BE-së, Pieter Feith.Megjithëse ende nuk kanë marrë konfirmim, përfaqësues të institucioneve vendore besojnë se ministrit Skënder Hyseni do t’i mundohet të flasë në Këshillin e Sigurimit dhe të paraqesë versionin zyrtar për incidentin në Lagjen e Boshnjakëve në veri të Mitrovicës. Strategjia pa detaje Zëvendësministrja e Punëve të Jashtme, Vlora Çitaku ka thënë se Kosova ka strategji si të veprojë pas mendimit që pritet të japë Gjykata Ndërkombëtare e Drejtësisë rreth ligjshmërisë së pavarësisë së vendit. Më pak se tri javë kanë mbetur kur Gjykata Ndërkombëtare e Drejtësisë pritet të japë mendimin rreth ligjshmërisë së pavarësisë së Kosovës, ndërsa përfaqësuesit e institucioneve në Prishtinë tashmë deklarojnë hapur se kanë në duart e tyre një strategji për hapat që do t’i ndërmarrë Kosova ne prag të këtij vlerësimi.Mirëpo, nga ana tjetër njohës të ligjeve ndërkombëtare pohojnë se strategjia është e vonuar dhe se nevojitet dinamizëm më i madh nga pala kosovare sa i përket GJND-së dhe kërkesës ndërkombëtare për bisedime me Beogradin. Maqedonia e Kosova nënshkruajnë marrëveshje në energjetikë Maqedonia dhe Kosova sot do të nënshkruajnë një memorandum bashkëpunimi në sektorin energjetik.Memorandumin sot paradite në Shkup do ta nënshkruajnë ministri i Ekonomisë, Fatmir Besimi dhe ministrja e Energjetikës dhe Minierave të Kosovës, Justina Shiroka Pula. Admirali Stavridis viziton sot Kosovën Komandanti i NATO-s, admirali amerikan Xhejms Stavridis, nesër viziton Kosovën.Stavridis do të takohet me drejtuesit e misionit të NATO-s në Kosovë si dhe do të japë një konferencë shtypi në orët e pasdites, njoftojnë burimet e Aleancës

03.07.2010.

Kryeministri fton qytetarët të përmbahen nga dhuna

Kryeministri Hashim Thaçi në një konferencë të jashtëzakonshme për shtyp, pas ngjarjeve në Mitrovicë, tha se situata tani më është nën kontroll.Ai ftoi qytetarët që të përmbahen nga rastet që nxisin dhunë dhe tha se po zhvillohen hetime për ngjarjen.

Shpërthimi u shkaktua nga ekstremistët serbë

Qeveria e Kosovës është zotuar se nuk do ta mbyll dhe as nuk do t’ia ndryshoj logon Zyrës për shërbime civile të hapur të premten në Lagjen e Boshnjakëve, me gjithë kundërshtimin e strukturave paralele serbe në pjesën veriore të Mitrovicës. Hapja e kësaj zyre, në të cilën qytetarët e Mitrovicës do të mund të pajisen me dokumente personale të Republikës së Kosovës, ka shkaktuar pakënaqësi te strukturat paralele serbe.Kundër hapjes së kësaj zyre protestuan disa qindra serb lokal ne c’rast ndodhi një shpërthim që la të vdekur një person të komunitetit boshnjak dhe plagosi 10 persona të tjerë, kryesisht pjesëtarë të komunitetit serbë.Presidenti dhe kryeministri i Republikës së Kosovës shprehen keqardhje për viktimat, u bënë thirrje qytetarëve për përmbajtje nga veprimet e dhunshme dhe kërkuan nga organet kompetente të ndriçojnë rastin.Ndërkohë ministri i Punëve të Brendshme të Kosovës, Bajram Rexhepi, ka shpërfillur kërkesën e Zyrës Civile Ndërkombëtare (ICO) për të hequr logon e Qeverisë së Kosovës nga objekti i Zyrës për regjistrimin civil.Ministri Rexhepi ka thënë se nuk do të ketë tërheqje prapa, pavarësisht situatës.   Hetimet e para policore, sipas tij, kanë treguar se shpërthimi që ka ndodhur në veri të Mitrovicës është pasojë e pakujdesisë së ekstremistëve serbë të cilët, siç tha ministri, dyshohet se kanë qenë duke qarkulluar me armatim gjatë kohës kur po protestohej kundër hapjes së zyrës së Qeverisë së Kosovës për regjistrim civil.

Dell thotë se do të vazhdojë miqësia mes amerikanëve dhe kosovarëve

Me rastin e shënimit të 4 Korrikut, Ditës së Pavarësisë së SHBA-ve, Ambasadori amerikan në Kosovë, Kristofer Dell, shprehu edhe një herë mbështetjen e vendit të tij për Kosovën.duke thënë se miqësia ndërmjet popujve të dyja vendeve do të vazhdojë edhe në të ardhmen.

02.07.2010.

Sejdiu dënoi shpërthimin në Mitrovicë

Presidenti i Republikës së Kosovës, Fatmir Sejdiu dënoi shpërthimin në “Lagjen e Boshnjakëve” në Mitrovicë, të cilët po protestonin kundër hapjes së Zyrës së Qeverisë së Kosovës në këtë qytet. Institucionet e Republikës së Kosovës janë thellësisht të përkushtuara për krijimin e një mjedisi paqësor, stabil dhe të sigurt për të gjithë qytetarët e vendit pa dallim etnie e besimi, prandaj vlerësojmë se aktet e dhunshme si ky i sotmi janë tërësisht të papranueshme”, pohoi presidenti.Ai vlerësoi se dhuna cenon interesat e të gjithë qytetarëve të Kosovës, ndërkaq kërkoi nga institucionet përgjegjëse, vendëse dhe ndërkombëtare, që urgjentisht ta ndriçojnë këtë akt, kurse fajtorët t’i nxjerrin përpara drejtësisë.Ndryshe, disa persona janë plagosur, ndërsa njëri prej tyre pohohet të ketë vdekur nga shpërthimi që ndodhi të premten rreth orës 10:00 në Lagjen e Boshnjakëve në Mitrovicë.Disa qindra serbë ishin mbledhur mëngjesin e së premtes në Lagjen e Boshnjakëve, në pjesën veriore të Mitrovicës, për të protestuar kundër hapjes së Zyrës së Qeverisë së Kosovës, e cila do të shërbejë për pajisjen e qytetarëve me dokumente identifikimi.

Rexhepi: Situata është nën kontroll

Kryeministri i vendit, Hashim Thaçi ka përshëndetur të premten hapjen e Zyrës së Qeverisë së Republikës së Kosovë në veri të Mitrovicës, në të cilën do të ofrojnë shërbimet e veta Ministria e Punëve të Brendshme dhe Ministria e Administrimit të Pushtetit Lokal. Kreu i ekzekutivit të vendit në mbledhjen e Qeverisë theksoi se kjo Zyrë do të ofrojë shërbime për të gjithë qytetarët e kësaj ane dhe do të ndihmojë integrimin e tyre në shoqërinë dhe institucionet kosovare.Ministri i Punëve të Brendshme, Bajram Rexhepi njoftoi kabinetin qeveritar me zhvillimet në veri të Mitrovicën, me rastin e hapjes së Zyrës së Qeverisë në këtë pjesë të qytetit.Ai theksoi se disa qindra qytetarë të nacionalitetit serb janë mbledhur duke protestuar kundër hapjes së kësaj zyre dhe kanë provuar të afrohen kësaj zyre, por janë penguar nga Policia e Kosovës.Ministri Rexhepi ka njoftuar se po në këtë kohë ka ndodhur një shpërthim i një granate, larg turmës së protestuesve dhe Zyrës së Qeverisë, dhe në këtë rast janë lënduar së paku 11 persona.Sipas ministrit Rexhepi, situata është nën kontroll, dhe zyra e Qeverisë ka vazhduar të jetë e hapur.

Shpërthim në Mitrovicë, një i vdekur, disa të plagosur

Disa persona janë plagosur, ndërsa njëri prej tyre pohohet të ketë vdekur nga shpërthimi që ndodhi të premten rreth orës 10:00 në Lagjen e Boshnjakëve në Mitrovicë. Të plagosurit ishin duke protestuar kundër hapjes së Zyrës së Qeverisë së Kosovës në Mitrovicën veriore. Mediat serbe njoftojnë se është një i vdekur nga plagët e marra në shpërthimin që ndodhi në protestat e sotme në veri të Mitrovicës. Policia nuk ka publikuar të dhëna për shpërthimin, ndërsa raportohet se gjendja atje është nën kontroll.Zëdhënësi i Policisë së Kosovës për rajonin e Mitrovicës, Besim Hoti, i tha Radios Evropa e Lirë se përveç shpërthimit, janë regjistruar edhe të shtëna me armë zjarri.Në orën 10, në kohën kur është mbajtur kjo protestë, policia ka regjistruar së paku një shpërthim dhe të shtëna me armë zjarri. Në bazë të informacioneve, ende të pakonfirmuara zyrtarisht, njoftohet se ka persona të lënduar. Nuk dimë se në çfarë rrethanash apo për sa persona të lënduar bëhet fjalë. Sidoqoftë, mbetet të konfirmohet nga hetuesit policorë që janë në vendngjarje, bashkë me EULEX-in”, tha Hoti.

Zëdhënësi Hoti, duke u bazuar në informacionet nga terreni, tha se të lënduarit janë dërguar në qendrën spitalore në veri të qytetit. Por, ai sqaroi se ende nuk dihet përkatësia etnike apo numri i saktë i të lënduarve.Disa qindra serbë ishin mbledhur mëngjesin e së premtes në Lagjen e Boshnjakëve, në pjesën veriore të Mitrovicës, për të protestuar kundër hapjes së Zyrës së Qeverisë së Kosovës, e cila do të shërbejë për pajisjen e qytetarëve me dokumente identifikimi.Lajmi për hapjen e kësaj zyre ka shqetësuar strukturat paralele, të cilët pasi i kanë lëshuar sirenat për gjoja gjendje të jashtëzakonshme kanë arritur t’i mbledhin disa qindra serbë.Mbi urën që ndanë qytetin e Mitrovicës janë stacionuar forca të mëdha të policisë dhe KFOR-it.

Tadic: Incidenti në Mitrovicë provokim

Incidenti i sotëm në Mitrovicë ishte provokim për paqen dhe Serbinë”, ka deklaruar presidenti serb Boris Tadic. Tadic ka theksuar se Beogradi nuk do të veprojë ndaj provokimeve, por do të kërkojë reagimin e të gjitha organizmave ndërkombëtare. Deklarata e Tadicit u bë pas incidentit të sotëm në Mitrovicë. Një shpërthim ndodhi në veri të Mitrovicës, në kohën kur rreth një mijë serbe po protestonin kundër hapjes së Zyrës për Regjistrim Civil në këtë lagje. Policia thotë se ka të lënduar, por nuk di numrin e tyre.Aktualisht, protestuesit janë shpërndarë, ndërsa hetues të Policisë së Kosovës dhe të EULEX-it, po hetojnë rrethanat në të cilat ndodhi shpërthimi.

Vetëm pas njohjes mund të diskutohet për kufijtë

Drejtuesi i një organizatë joqeveritare për këshilla diplomatike në Bruksel, Nicholas Wyatt, shpreson që vendimi i Gjykatës Ndërkombëtare të Drejtësisë do t’i ofrojë Beogradit një mundësi për të biseduar me udhëheqësit e vendit fqinj, Kosovës. Në një bisedë për BBC-në, Wyatt, drejtues i “The Independent Diplomat”, tha se për sa kohë që Serbia të mos e njohë Kosovën, çështja e kufijve mes dy vendeve është e një rëndësie dytësore.Ai tha se ideja për shkëmbim territoresh është e pamundshme për t’u propozuar dhe njëkohësisht e pamundshme për t’u zbatuar.“Të jemi të qartë, se kjo ide nuk është propozuar ende dhe asnjëra palë nuk e ka shtruar atë në tryezë. Në fakt, as që kanë tryezë bisedimesh se ku ta shtrojnë. Unë do të befasohesha shumë sikur kjo të bëhej çështje serioze diskutimi. Kjo për disa arsye. Arsyeja kryesore lidhet me faktin se ajo nuk i përgjigjet pyetjes kyçe që ka të bëjë me çështjen e marrëdhënieve ndërmjet Kosovës dhe Serbisë, nëse Serbia mund ta njohë Kosovën si shtet të pavarur. Më duket se, për sa kohë kjo çështje nuk është zgjidhur, çështja e kufijve është e dorës së dytë”.

Krasniqi: Politika të pastrohet nga krimi   

Kryeparlamentari Jakup Krasniqi konsideron se perspektiva e vendit nuk duhet të mbetet peng i mosluftimit të korrupsionit dhe krimit të organizuar. Por, apelon te sistemi i drejtësisë që ndjekjen e njerëzve ta bëjë mbi bazën e fakteve dhe dëshmive dhe jo mbi bazën e opinioneve. Kryetari i Kuvendit të Kosovës, Jakup Krasniqi në një intervistë për Kohën Ditore nuk përton t’i përgjigjet ushtruesit të detyrës prokurorit të EULEX-it Johannes Van Vreesëijk, i cili para pak ditësh ka thënë se “presidenti, ndoshta është dashur ta emëronte atë prokuror”.Ai jo vetëm se nuk i bën naze këtij profesioni, por e konsideron edhe si fat për vendin sikur prokuroria e shtetit ta kishte një njeri të guximshëm që do të merrte vendime të pavarura nga politika dhe do të luftonte çdo formë të korrupsionit dhe krimit të organizuar.Krasniqi është i bindur se arrestimi i “peshqve të mëdhenj” nuk do të destabilizonte vendin, por përkundrazi do ta hiqte një “hipotekë” që mund ta dëmtojë procesin e integrimit në BE.

ICO mbështet bisedimet Prishtinë-Beograd

Zyra Civile Ndërkombëtare mbështet bisedimet mes Kosovës dhe Serbisë, pasi Gjykata Ndërkombëtare e Drejtësisë do të japë mendimin e vet rreth ligjshmërisë së pavarësisë së Kosovës, mirëpo zyrtarët e ICO-së nuk pranojnë që këto bisedime të prekin statusin apo integritetin territorial të Kosovës. ”Ne nuk mund të spekulojmë për bisedimet e mundshme mes Prishtinës e Beogradit, apo për opinionin e GJND-së. Megjithatë, ne besojmë që opinioni i GJND-së do të krijojë mundësinë që të dyja vendet të adresojnë çështjet e përbashkëta, pa prekur këtu statusin e Kosovës apo integritetin territorial”, ka thënë zëdhënësi i ICO-së, Kai Muller Berner.

01.07.2010.

Serbia duhet ta njohë Kosovën nëse synon Evropën

Kryeministri i Republikës së Kosovës, Hashim Thaçi, ka deklaruar se kurrë më nuk do të ketë negociata të reja për statusin. Ai ka thënë se Kosova është shtet i pavarur dhe sovran dhe se nuk ka kthim prapa. Kryeministri Thaçi ka thënë se Prishtina e ka përmbyllur diskutimin për statusin gjatë pothuajse tri vjet negociimi me Beogradin.“Integriteti territorial i Kosovës është i pacenueshëm dhe i njohur ndërkombëtarisht. Ndarja është një ëndërr e keqe e Sllodoban Millosheviqit, i cili ende jeton në disa qarqe në Beograd”, ka thënë kryeministri i Kosovës për të përjavshmen e Beogradit NIN.Thaçi ka thënë se me presidentin serb Tadic mund të flasë për marrëdhëniet e fqinjësisë së mirë, për çështjet teknike.Me Serbinë mund të bisedojmë për personat e zhdukur, energjinë, kthimin e lëndës arkivore dhe artefaktet arkeologjike, kontrollin e përbashkët të kufijve - siç do të punohet me të gjitha vendet e tjera të rajonit, ujërat, transportin, luftën kundër krimit të organizuar dhe sundimin e ligjit”.Sa i përket bisedimeve me presidentin serb, Thaçi ka thënë se Tadic, nëse e dëshiron Serbinë në NAT0 dhe Bashkimin Evropian, së pari duhet ta njohë Republikën e Kosovës.

Spanja “nuk përzihet” në çështjen e statusit

Presidenca e Bashkimit Evropian edhe më tej insiston se duhet nisur dialogu në mes të Prishtinës dhe Beogradit për çështje praktike. Miguel Angel Moratinos, ministër i Jashtëm spanjoll, ka deklaruar se Kosova dhe Serbia duhet të bisedojnë për çështje praktike. Moratinos, vendi i të cilit e përfundoi udhëheqjen e radhës të presidencës së Bashkimit Evropian, ka thënë se shteti të cilin ai e përfaqëson nuk përzihet në çështjet e statusit të Kosovës dhe precizoi se apeli për dialog bëhet vetëm për aspektin praktik, sepse kjo sipas tij do ndihmonte në avancimin e kushteve të jetës të qytetarëve të rajonit.Sa i përket statusit, ai përsëriti se kjo iu takon palëve të vendosin.Pavarësisht nga njohja apo mosnjohja, Spanja ka inkurajuar kosovarët që të punojnë në çështjet praktike në mënyrë që të përmirësojnë jetën e njerëzve dhe ky do jetë angazhimi ynë i vazhdueshëm pavarësisht çështjeve legale dhe çështjes së njohjes”.

Kina pa votë për Kosovën në GJND

Asambleja e Përgjithshme e Kombeve të Bashkuara ka zgjedhur të martën kinezen Sue Hankin anëtare të re të Gjykatës Ndërkombëtare të Drejtësisë. Siç është njoftuar nga selia e OKB-së, gjykatësja e re nga Kina nuk mund të marrë pjesë në miratimin e vendimit për rastin e Kosovës, sepse një pjesë e madhe e procesit është zhvilluar pa pjesëmarrjen e saj.Vendi i gjykatëses kineze ka qenë vakant që nga 28 maji, kur pararendësi i saj është pensionuar. Gjykatësit zgjidhen me mandat nëntëvjeçar, por detyra e kinezes do të zgjasë deri më 5 shkurt të vitit 2012 deri kur është dashur të punojë pararendësi i saj.

Maqedonia kundër ndarjes së Kosovës

Zëvendëskryeministri i Maqedonisë, Abdylaqim Ademi, ka deklaruar se Maqedonia i konsideron si të rrezikshëm zërat për një shkëmbim territoresh mes Kosovës e Serbisë. Ai ka thënë se këto janë ide të vjetra, gjithashtu të rrezikshme dhe tendencioze, në radhë të parë për shqiptarët. Sipas Ademit, këto ide do t'i dëmtonin më së shumti shqiptarët se çdo kënd tjetër në rajon.“Mendoj se këto ide jepen nga Serbia edhe për të defokusuar vëmendjen e opinionit nga ajo që ndodh me shtetin e ri, me institucionet e reja në Kosovë, me zhvillimin që ka Kosova dhe me zhvillimin që kanë popujt e rajonit në krahasim me Serbinë”.Ademi ka thënë se këto ide janë të papranueshme, në radhë të parë, për Kosovën dhe popullin e Kosovës dhe pastaj edhe për shtetet e tjera, sidomos për Maqedoninë.“Kosova tanimë po dëshmon se është shtet që prodhon stabilitet. Kosova është e pranuar nga një sërë shtetesh të botës dhe ata që e pranojnë pavarësinë e Kosovës e pranojnë sigurisht edhe planin e presidentit Ahtisaari, i cili Kosovën e njeh me kufijtë administrativë dhe ata kufij tanimë janë kufij të njohur ndërkombëtarisht. Janë kufij të shtetit të Kosovës”.